«Awıl xojalıǵın mexanizaciyalastırıw dárejesin jáne de arttırıw ilajları haqqında»ǵı Prezident qararı qabıl etiliwi menen agrotexnikalıq xızmetlerdi kórsetiwshiler jer salıǵı hám múlk salıǵın azaytılǵan halda tóleytuǵın boldı. Bul haqqında «Huqıqıy málimleme» kanalı xabar berdi.

Qararǵa bola, awıl xojalıǵı texnikalarına xızmet kórsetiwshi isbilermenlerdiń talabına tiykarlanıp, xalıqtıń bántligine kómeklesiw orayları jollaması arqalı jumıssız jaslar zamanagóy awıl xojalıǵı texnikalarına xızmet kórsetiwshi qánige sıpatında oqıtıladı. Bul processte jaslardı traktorshı-mashinist sıpatında qayta tayarlaw qárejetleri Bántlikke kómeklesiw mámleketlik qor tárepinen qaplanadı.
Sol sebepli, 2025-jıl 1-yanvardan 2028-jıl 1-yanvarǵa shekem awıl xojalıǵı texnikaların ońlaw hám agrotexnikalıq xızmetler kórsetiwshi isbilermenlerge bir qatar salıq jeńillikleri berildi. Sonıń ishinde, yurilikalıq táreplerdan alınatuǵın jer salıǵı hám yuridikalıq táreplerdiń múlkine salınatuǵın salıq stavkaları 50 procentke azaytıladı. Bul jeńillikler egin maydanların lazerli jer tegislegishler arqalı tegislew, ǵawashanı chekankalaw hám defoliaciyalaw xızmetlerin kórsetiwshi isbilermenlerdi qollap-quwatlawǵa qaratılǵan.
Sonday-aq, jergilikli awıl xojalıǵı texnikaların islep shıǵarıwshı kárxanalarǵa da salıq hám bajxana jeńillikleri jaratıldı. Qararǵa bola,bul kárxanalar óz talabı ushın sırt elden alıp kelinetuǵın komplektlewshi hám awısıq bólekler 2028-jıl 1-yanvarǵa shekem bajxana bajınan azat etiledi. Bul bolsa jergilikli awıl xojalıǵı texnikaların islep shıǵarıwshılarınıń básekige shıdamlılıǵın arttırıwǵa xızmet etedi.
Awıl xojalıǵı texnikaların ońlaw hám xızmet kórsetiw tarawın rawajlandırıw boyınsha kórilip atırǵan bul ilajlar xalıqtıń bántligin arttırıw hám taradaǵı isbilermenlerdi tayarlaw qárejetleriniń qaplanatuǵını tarawda joqarı nátiyjelilikke erisiw imkaniyatın beredi. Bul ilajlar awıl xojalıǵı texnikalarınıń sapalı xızmet kórsetetuǵını hám texnikalıq infrastrukturanıń jáne de rawajlanıwına túrtki boladı.
Qarar tiykarında gózlengen maqsetlerden biri –zamanagóy texnologiyalardan paydalanǵan halda awıl xojalıǵı ónimleriniń islep shıǵarıw nátiyjeliligin arttırıw bolıp esaplanadı. Húkimettiń bul baslamaları tarawdı jedel rawajlandırıw hám investiciyalıq ortalıqtı jaqsılawǵa qaratılǵan bolıp, mámlekettiń agrar sektorında áhmiyetli ózgerislerge alıp keletuǵını kútilmekte,-dep málimleme beredi xs.uz saytı.

Qaraqalpaqstan xabar agentligi