Ózbekstan hám Evropanıń jetekshi analitikalıq orayları, sonıń ishinde, «Rawajlanıw strategiyası» orayı hám mámleketimizdiń Belgiyadaǵı elshixanası menen birgelikte Bryussel qalasında «Ózbekstan –Evropa Awqamı» forumı bolıp ótti.
Forumda Oliy Majlis Senatı Baslıǵınıń birinshi orınbasarı Sodiq Safoev kiris sózi menen qatnastı. Ilaj dawamında analitikalıq oraylar ekspertleri tárepinen Evropa Awqamınıń Ózbekstan hám Oraylıq Aziya menen qatnasıqları kórip shıǵılıp, birge islesiwdiń tiykarǵı tárepleri, atap aytqanda, regionda eki hám kóp tárepleme qatnasıqlardı bekkemlew perspektivaları dodalandı.
Еkspertler tárepinen Evropa Awqamı hám Oraylıq Aziya mámleketleri arasında ekonomikalıq integraciya hám sawdanı bekkemlew imkaniyatları hám Ózbekstan menen óz-ara birge islesiw dinamikasında ayrıqsha itibar qaratıldı, delinedi «Rawajlanıw strategiyası» orayınıń maǵlıwmatında.
Sonday-aq, regionnıń global ekonomikalıq hám siyasiy processlerindegi strategiyalıq roli, sonıń ishinde, transport hám eneregetika jollarınıń tásiri, turaqlı infrastrukturanı rawajlandırıw, «jasıl» ótiw hám sanlastırıwdı qollap-quwatlaw máseleleri kórip shıǵıldı. Qatnasıwshılar Evropa Awqamı hám region mámleketleri arasında óz-ara isenim hám strategiyalıq qarım-qatnastı bekkemlew áhmiyetli ekenligin atap ótti.
Sóylesiwlerde Evropa Awqamı hám Oraylıq Aziya mámleketleri ushın jańa imkaniyatlar jaratıwǵa járdem beretuǵın turaqlı rawajlanıw, bilimlendiriw hám mádeniy almasıw tarawında birgeliktegi baslamalar, regionallıq turaqlılıq hám qáwipsizlik, transshegaralıq qáwiplerge qarsı gúresiwde birge islesiw máseleleri haqqında sóz boldı.
Forum sheńberinde, sonıń ishinde, Ózbekstannıń analitikalıq orayları delegaciyası wákilleriniń Bryussel qalasında Patshalıq xalıqaralıq qatnasıqlar institutı (EGMONT) bas direktorı Pol De Vitto menen ushırasıwı shólkemlestirildi. Onda Ózbekstanda ámelge asırılıp atırǵan reformalar, atap aytqanda, «Ózbekstan-2030» strategiyasınıń mazmun-mánisi hám áhmiyeti haqqında maǵlıwmat berildi.
Óz gezeginde EGMONT institutınıń bas direktorı Pol De Vitto mámleketimizde júz berip atırǵan sociallıq-ekonomikalıq modernizaciyalaw processleri, sonday-aq, mámleketimizdiń regionda turaqlılıqtı bekkemlewge xızmet etip atırǵan pragmatikalıq hám konstruktivlik sırtqı siyasattı joqarı bahaladı.
Qızǵın ruwxta ótken ushırasıwda Ózbekstan analitikalıq orayları hám EGMONT institutı arasında birge islesiw qatnasıqların jáne de rawajlandırıw, birgelikte usınıslar islep shıǵıw, ámelde engiziw máseleleri boyınsha pikir alısıldı.
A.Rustamov, ÓzA