Ózbekstannıń Ayrıqsha hám Tolıq huqıqlı Elshisi Oybek Shaxavdinov (rezidenciyası Budapeshtte jaylasqan) Sloveniya Prezidenti Natasha Pirc Musarǵa isenim jarlıqların tapsırdı. Bul haqqında «Dúnya» agentligi xabar berdi.
Rásmiy máresimnen soń bolıp ótken sóylesiw dawamında Ózbekstan hám Sloveniya arasındaǵı eki tárepleme qatnasıqlardı rawajlandırıw perspektivaları dodalandı.
Sawda-ekonomikalıq hám investiciyalıq birge islesiwdi bekkemlew máselelerine ayrıqsha itibar qaratıldı. Sonday-aq, siyasiy, ekonomikalıq hám mádeniy tarawlardaǵı birge islesiwdi jedellestiriwge qaratılgan túrli dárejedegi eki tárepleme ilajlar kestesi kórip shıǵıldı. Hár eki tárep qatnasıqlardı jáne de rawajlandırıw hám birgeliktegi joybarlardı ámelge asırıwǵa tayar ekenin tastıyıqladı.
Esletip ótemiz, bıyılǵı jıldıń oktyabrinde Ózbekstannıń Sloveniyadaǵı birinshi elshisi etip tayınlanǵan Oybek Shaxavdinov usı mámlekettiń Sırtqı isler ministrligine óziniń isenim jarlıqları nusqaların tapsırǵan edi.
Oybek Shaxavdinov Ózbekstannıń Vengriyadaǵı (rezidenciyası Budapeshtte jaylasqan) birinshi, sonday-aq, qosa alıp barıw tiykarında Xorvatiya, Chernogoriya hám Sloveniyadaǵı elshisi bolıp esaplanadı.
Qaraqalpaqstan xabar agentligi