Kuveyttiń «Alrai Media» basılımı Ózbekstan elshisi Ayubxon Yunusov hám Kuveyt jumısshı kúshi boyınsha bas komitetiniń direktorı Mazruk Al- Utaybiy menen ushırasqanın jazıp shıqtı.

Maqalada atap ótiliwinshe, tárepler migraciya tarawında birge islesiwdi jedellestiriw, Kuveyttiń túrli mámleketlik hám jeke menshik sektorlarında elimizdiń puqaraların nızamlı túrde jumıs penen támiyinlew máselelerin dodalaǵan.
Óz-ara sóylesiw waqtında Mazruk Al-Utaybiy Kuveyttiń miynet bazarı talapları tiykarında zárúr qánigelikler boyınsha maman sırt el jumısshı kúshin jallaw procesin rawajlandırıw boyınsha mámlekette izbe-iz háreketler alıp barılıp atırǵanın bildirgen.
Ushırasıwda házirgi kúnde Kuveyt miynet bazarında tiykarınan densawlıqtı saqlaw hám xızmet kórsetiw tarmaqlarında jumısshı kúshine talap bar ekenligi málim etildi. Bul tarawlarda Ózbekstan puqaraların Kuveytte jumıs penen támiyinlew ushın eki tárepleme birge islesiwdiń huqıqıy menshik tiykarların jaratıw áhmiyetli ekenligi atap ótildi.
Sóylesiw juwmaǵında eki mámlekettiń tiyisli shólkemleri arasında jeke menshik sektorda jumısshı kúshi menen almasıw tarawında óz-ara kelisim memorandumı joybarın islep shıǵıw hám qol qoyıw, sonday-aq, tárepler arasında onlayn sóylesiwler ótkeriw haqqında kelisip alındı.

Muharrama Pirmatova, ÓzA