Los-Andjeles-2028 jazǵı Olimpiada oyınları cikline múnásip tayarlıq kóriw, aymaqlardaǵı sport obyektlerinde alıp barılıp atırǵan jumıslar menen tanısıw maqsetinde, Ózbekstan Milliy Olimpiada komiteti hám sport tarawı basshıları respublikamızǵa keldi.

Olar eń dáslep elimiz sportına kóplegen kúshli jas sportshılardı tárbiyalap jetistirip atırǵan Nókis Olimpiya hám Paralimpiya sport túrlerine tayarlaw orayında bolıp, oraydıń jumısı hám onıń materiallıq-texnikalıq bazası menen jaqınnan tanıstı. Sapar dawamında rásmiy wákiller oqıw ornında oqıp atırǵan oqıwshılar menen ushırasıp, olardıń sabaq ótiw barısı hám keleshektegi maqsetleri haqqında sáwbetlesti.
Sonı aytıp ótiwimiz kerek, Qaraqalpaqstanda dzyudo, sport gúresleri, qılıshlasıw, awır atletika sıyaqlı sport túrleri jaqsı rawajlanıp, aymaq trenerleri Ózbekstan saylandı komandasına kúshli atletlerdi jetistirip bermekte.
Sonlıqtan, xızmet saparı dawamında taraw basshıları Xojeli rayonı sport mektebi, Nókis joqarı sport hám jeke gúres túrlerine qánigelesken sport mektepleriniń de turmısı menen jaqınnan tanıstı.
Úyreniwler sońında Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ministrler Keńesiniń Baslıǵı Farxad Еrmanov hám sport tarawı juwapkerleriniń qatnasıwında májilis ótkerildi.
Májiliste sózge shıqqanlar tárepinen aymaqlıq federaciyalardıń jumısların kúsheytiw, komandalıq sport túrlerine itibar qaratıw, jańa Olimpiada ciklinde saylandı komandalar quramına talaban sportshılardı sociallıq qollap-quwatlaw sıyaqlı máseleler boyınsha másláhátler berilip, bul boyınsha jergilikli qánigelerdiń pikir-usınısları tıńlandı.

Qaraqalpaqstan xabar agentligi