Ózbekstan Respublikası Prezidenti Shavkat Mirziyoevtiń Birlesken Arab Ámirlikleri sanaat hám aldıńǵı texnologiyalar ministri Sulton Ahmad Al-Jobir hám energetika hám infrastruktura ministri Suhayl Muhammad Al-Mazruiyden ibarat delegaciya menen ushırasıwda ámeliy birge islesiwdi jáne de keńeytiw hám investiciyalıq sheriklik joybarların alǵa qoyıw máseleleri kórip shıǵıldı.

Sóylesiw aldında Sultan Al-Jobir mámleketimiz basshısına Ámirlikler Prezidenti Shayx Muhammad Ol Naxayan, mámleket Bas ministri, Dubay Ámiri Shayx Muhammad Ol Maktum hám Vice-prezidenti Shayx Mansur Ol Naxayannıń sálemin hám jaqsı tileklerin jetkerdi.
Ushırasıwda Ózbekstan –BAA kóp táreplemeli qatnasıqlardıń búgingi joqarı dárejesi ayrıqsha minnetdarshılıq penen atap ótildi. Óz-ara tovar almasıw kólemi, birgeliktegi kárxanalar menen aviaqatnawlar sanı artpaqta. Birlesken Arab Ámirlikleri jetekshi kompaniyalarınıń qatnasında Ózbekstanda ámelge asırılıp atırǵan hám perspektivalı joybarlar portfeli 20 milliard dollarǵa jetti.
«Jasıl» energetika eki tárepleme birge islesiwdiń tiykarǵı baǵdarı bolıp xızmet etpekte. Nawayı wálayatında quwatlılıǵı 500 megavatt bolǵan samal stanciyası iske qosıldı- bul joybar Masdar kompaniyası tárepinen ámelge asırıldı.
Ulıwma, bul kompaniyanıń qatnasıwında sońǵı jıllarda mámleketimizde ulıwma quwatlılıǵı 1,5 gigavatt bolǵan elektr energiyasın islep shıǵarıw obyektleri iske túsirildi.
Еnergetika, neft-gaz hám ximiya tarmaqları, taw-kán sanaatı, suw támiynatı, xojalıq shıǵındıların qayta islew hám basqa baǵdarlarda iri investiciya joybarların tez waqıt ishinde tayarlaw hám ámelge asrırıwǵa ayrıqsha itibar qaratıldı.
Barlıq dárejelerdegi nátiyjeli sóylesiwlerdi dawam ettiriw hám bolatuǵın joqarı dárejedegi ilajlarǵa puxta tayarlıq kóriw áhmiyetli ekenligi atap ótildi.

ÓzA