Bizge belgili, Bilim hám mamanlıqlardı bahalaw agentligi tárepinen Ózbekstan Respublikası Ministrler Kabinetiniń 2022-jıl 16-fevraldaǵı «Shet tilin biliw dárejesin anıqlaw boyınsha mámleketlik xızmetler kórsetiwdiń hákimshilik reglamentin tastıyıqlaw haqqında»ǵı qararı tiykarında shet tillerinen milliy sertifikat imtixanları ótkerilip kelinbekte.

Sociallıq tarmaqlarda Agentlik tárepinen shet tili sertifikatları satılıp atırǵanı, tanıs-bilisshilik arqalı berilip atırǵanı haqqında xabarlar tarqaldı hám pikirlerge sebep boldı.
Bilim hám mamanlıqtı bahalaw agentligi usı xabar boyınsha túsinik berdi.
Agentlik shet tilinen sertifikat imtixanların ótkeriw hám sertifikat beriwde qalıslıq, ádillik hám ashıq-aydınlıqtı támiyinlewde óz principlerine sadıqlıǵın, hár qanday korrupciyalıq jaǵdaylarǵa mawasasız qatnasta bolatuǵının ayrıqsha atap ótti. Jámiyetshilik penen baylanıslarda bárqulla ashıqlıǵın bildiredi.
Sonday-aq, shet tilin biliw dárejesin bahalaw sınaǵınıń tıńlap túsiniw hám oqıw bólimleri insan faktorı qatnasıwısız tolıq avtomatlastırılǵan tártipte tekseriledi. Jazıw hám sóylew bólimleri ushın berilgen juwaplardı tekseriw aralıqtan elektron platforma arqalı ámelge asırıladı hám tekseriwshi ekspertler kútilmegen halda (random) tańlanadı. Bul tártip bahalawda insan faktorı tásirin minimallastıratuǵının atap ótemiz.
Agentlik jumısınıń barlıq basqıshları, atap aytqanda, sınaqlar hám bahalaw nátiyjeleri jámiyetshilikke ashıq bolıp, tiyisli tártipte qadaǵalanadı.
Agentlik tárepinen shólkemlestirilip, ótkerilip atırǵan imtixanlarda korrupciya jaǵdayları baqlansa yaki talaban, olardıń ata-anaları usınday jaǵdaylarǵa gúwa bolsa, Agentliktiń isenim telefonına, huqıq qorǵaw uyımlarına múrájat etiwi soraladı. Sonıń menen birge, jámiyetshilikten tastıyıqlanbaǵan maǵlıwmatlardı sociallıq tarmaqlar arqalı tarqatpawı, bul óz gezeginde juwapkershilikke sebep bolatuǵını esletiledi.

Muhayyo Toshqoraeva, ÓzA