Usı kúnlerde Malayziyanıń Kuala-Lumpur qalasında 28-Global Harmonization Working Party – GHWP májilisi bolıp ótpekte. Ilajda Ózbekstannıń atınan qatnasıp atırǵan Farmacevtika ónimleri qáwipsizligi orayınıń direktorı Alisher Temirov «Mámleketmizde medicinalıq buyım hám medicinalıq texnikanıń sapasın támiyinlewde qadaǵalaw» temasındaǵı bayanatı menen shıǵıp sóyledi. Ol óziniń shıǵıp sóylegen sózinde medicinalıq buyımlar hám medicinalıq texnikanıń qáwipsizligin támiyinlewde mámleketimizde ámelge asırılıp atırǵan jumıslar, sonday-aq, xalıqaralıq birge islesiwdiń áhmiyetine ayrıqsha itibar qarattı.

Farmacevtika ónimleriniń qáwipsizligi orayı baspasóz xızmeti bergen maǵlıwmatında keltiriliwinshe, bul áhmiyetli ilajda Oraydıń GHWPǵa aǵzalıqqa qabıl etiw haqqındaǵı sorawı shólkem aǵzaları tárepinen bir awızdan maqullanıp, Ózbekstan milliy tártipke salıw uyımı GHWPǵa tolıq aǵza sıpatında qabıl etildi.
Maǵlıwmat ushın, GHWP – bul global farmacevtika ónimleri hám medicinalıq úskenelerdi tártipke salıw tarawındaǵı xalıqaralıq shólkem bolıp, onıń maqseti dári quralları hám medicinalıq úskenelerdiń qáwipsizligin hám sapasın támiyinlewde global standartlardı muwapıqlastırıw hám olarǵa ámel etiwdi bekkemlew.
Házirgi waqıtta GHWPǵa dúnya boylap 30 dan artıq mámlekettiń farmacevtika hám medicina úskenelerin tártipke salıw uyımları aǵza bolıp, olardıń qatarında Evropa, AQSh, Yaponiya, Koreya, Qıtay hám basqa bir qatar mámleketler bar. Ózbekstannıń bul shólkemge aǵza bolıwı tártipke salıw tarawında xalıqaralıq standartlarǵa muwapıq islew, aldınǵı tájiriybe almasıw hám mashqalalardı birgelikte sheshiw imkaniyatın beredi.

Mohigul Qosimova, ÓzA