2017-jıldan berli Ózbekstan Respublikasında dekabr ayınıń ekinshi ekshembisi “Awıl xojalıǵı xızmetkerleri kúni – zúráát bayramı” sıpatında keńnen belgilenip kelinbekte. Bul kún elimizdiń diyqan hám fermerleri, qıytaq jer iyeleri, ilimpazlar jáne tarawǵa pútkil janın baǵıshlaǵan jankúyer xızmetkerlerge húrmet hám minnetdarshılıq bildiriw ushın ayrıqsha sáne bolıp esaplanadı.
Ózbekstan Sawda-sanaat palatası Qaraqalpaqstan Respublikası basqarmasında awıl hám suw xojalıǵı tarawı basshıları, fermer hám diyqan jojalıqları basshılarınıń qatnasıwında “Awıl xojalıǵı xızmetkerleri kúni” múnásibeti menen ilaj bolıp ótti.
Ilajda fermer xojalıqları, klasterler, qıytaq jer iyeleri, taraw ilimpazları hám keń jámiyetshilik wákilleri qatnastı.
Onda Ózbekstan Respublikası Awıl xojalıǵı ministri I.Abdurahmonov, Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev hám Qaraqalpaqstan Respublikası Awıl xojalıǵı ministri D.Kaypovlar shıǵıp sóylep, ilaj qatnasıwshıların bayram menen qızǵın qutlıqlap, awıl xojalıǵı tarawı xızmetkerleriniń xalqımızdıń abadanlıǵın arttırıwda, azıq-awqat qáwipsizligin támiyinlewde, mámleket ekonomikasınıń turaqlı rawajlanıwında ayrıqsha úles qosıp atırǵanlıǵın atap ótti.
Atap ótilgenindey, awıl xojalıǵı xızmetkerleriniń mashaqatlı miyneti arqasında bıyılǵı qıyın sınaqlar hám klimat sharayatlarına qaramastan, joqarı nátiyjelerge erisildi. Bul jetiskenlikler diyqan-fermerlerimizdiń, qıytaq jer iyeleriniń jańa texnologiyalardı ózlestiriwde hám aldaǵı tájiriybelerdi qollanıwda úlken tabısqa erisip atırǵanın kórsetedi.
Sánege baylanıslı taraw pidayıların sıylıqlaw máresimi bolıp ótti.
Ilaj dawamında tarawda pidayılıq úlgisin kórsetip kiyatırǵan 37 veteran “Ilǵor fermer”, “Mehnatkash dehqon”, “Namunali tomorqachi”, “Awıl xojalıǵı pidayısı,” “Suw xojalıǵı belsendisi,” “Ózbekstan Respublikası sharwashılıq pidayısı” sıyaqlı kókirek belgileri menen, 6 xızmetker dem alıw orınlarına biypul jollamalar menen sıylıqlandı.
Bul sıylıqlar olardıń miynetin tán alıw menen birge, basqa da diyqan hám fermerlerdi de joqarı nátiyjelerge erisiwge ilhamlandıratuǵını sózsiz.
Awıl xojalıǵı – bul tek ǵana ónim jetistiriw emes, al milliy miyrasımızdı hám turmıs tárizimizdi rawajlandırıwǵa qaratılǵan ullı islerden biri bolıp esaplanadı. Sonlıqtan, búgingi ilaj tek ǵana taraw xızmetkerlerin xoshametlew emes, al jámiyette miynetkesh hám pidayı insanlarǵa húrmet-itibardı arttırıw jolında da úlken áhmiyetke iye.
Atap aytqanda, fermerler hám diyqanlar materiallıq hám ruwxıy jaqtan qollap-quwatlanǵanda, olar tábiyiy túrde óndiris nátiyjeliligin arttırıwda jáne de úlken nátiyjelerge erisip, jańa joybarlardı ámeliyatqa engiziw menen birgelikte joqarı isbilermenlik kórsetkishine iye boladı. Bunday ilajlar bolsa, olardıń arasında salamat báseki ortalıǵın qáliplestirip, olarǵa jańa jetiskenliklerge erisiwde járdem beredi.
Á.Jiyemuratov,
Qaraqalpaqstan xabar agentligi.
M.Habibullaevtıń túsirgen súwretleri