Еkologiya, qorshaǵan ortalıqtı qorǵaw hám klimat ózgeriwi ministrligi wákillerinen ibarat Ózbekstan delegaciyası Shveycariyanıń Jeneva qalasında bolıp ótken Atmosfera hawasınıń uzaq aralıqlarda transshegaralıq pataslanıwı haqqındaǵı konvenciya Atqarıw uyımınıń 44-sessiyasında qatnastı. Konvenciya Evropa, Arqa Amerika hám Oraylıq Aziyanıń 50 den artıq mámleketin birlestirip, zamanımızdıń eń áhmiyetli ekologiyalıq mashqalalarınan biri – hawanıń transshegaralıq pataslanıwın sheshiw ushın platforma bolıp xızmet etedi.

Búgin adamzat jańa qáwipler aldında turǵanı sır emes. Jer sharınıń xalqı kóbeyiwde dawam etip atır, tábiyǵıy resurslar rezervi bolsa turaqlı túrde qısqarmaqta.
Ózbekstannıń sessiyada qatnasıwı mámlekettiń Konvenciyaǵa qosılıw imkaniyatların kórip shıǵıwǵa isenimli umtılıp atırǵanın kórsetedi. Bul qádem respublikanıń ekologiyalıq hám ekonomikalıq áhmiyetli baǵdarları, sonday-aq, «jasıl» ekonomikaǵa ótiw boyınsha strategiyalıq rejelerine sáykes keledi. «Jasıl ekonomika»ǵa ótiw bolsa Ózbekstanǵa kóplegen bonuslar alıp keledi. Atap aytqanda, «jasıl» ekonomikaǵa ótiw suw resurslarınan aqılǵa uǵras paydalanıw, hawanıń pataslanıwı, toǵaylardıń qısqarıwı, jerlerdiń degradaciyaǵa ushırawı hám klimat ózgeriwi sıyaqlı ekologiyalıq mashqalalardı sheshiwde járdem beredi.
Sessiya dawamında Ózbekstan delegaciyası tárepinen milliy ekologiyalıq siyasattıń tiykarǵı baǵdarları kórsetildi hám Konvenciyaǵa qosılıw imkaniyatları dodalandı.
– Hawanıń sapası turaqlı rawajlanıwdıń tiykarǵı elementi, – deydi Еkologiya, qorshaǵan ortalıqtı qorǵaw hám klimat ózgeriwi ministrliginiń qánigesi Aziza Sharafova. – Biz Ózbekstan aldında turǵan ekologiyalıq mashqalalardı sheshiwde xalıqaralıq tájiriybeni qollanıwdan mápdarmız. Konvenciyaǵa qosılıw milliy ekologiyalıq baslamalardı ámelge asırıw ushın jańa imkaniyatlar beredi. 2025-jıldıń mámleketimizde «Qorshaǵan ortalıqtı qorǵaw hám «jasıl» ekonomika jılı» dep járiyalanǵanı Ózbekstannıń qatnasıwı ushın áhmiyetli kontekst bolıp tabıladı.
Bıyılǵı jılı Ózbekstan xalıqaralıq ilajlarda, atap aytqanda, Astana qalasında ótkerilgen klimat hám hawanıń sapası boyınsha subregionallıq seminar hám Parijde bolıp ótken Konvenciya jumısshı toparları májilislerinde belsene qatnasqanı itibarǵa ılayıqlı. Bul birge islesiw Ózbekstanǵa hawanıń sapasın monitoring etiw boyınsha aldınǵı xalıqaralıq texnika hám texnologiyalar, ilimiy izertlewler hám pataslanıw dárejesin azaytıw qurallarınan paydalanıw imkaniyatın beretuǵın Konvenciyaǵa qosılıw jolındaǵı áhmiyetli qádem.
Atqarıw uyımınıń 44-sessiyası juwmaǵında Ózbekstan Konvenciyaǵa qosılıwı múmkin bolǵan barlıq táreplerdi bahalaǵan halda hújjetler menen islesiwdi dawam etedi.

Muhayyo Toshqoraeva, ÓzA