Prezident Shavkat Mirziyoev 12-dekabr kúni toqımashılıq hám teri sanaatındaǵı reformalardıń nátiyjeliligin jáne de arttırıw ilajları boyınsha májilis ótkerdi.

Bul tarmaqlar xalıqtıń bántliginde hám eksportta úlken áhmiyetke iye. Atap aytqanda, olarǵa tiyisli kárxanalarda 430 mıń puqara jumıs penen támiyinlengen. Jeńil sanaattıń jámi óndiristegi úlesi 14 procentti, eksportta 16 procentti quraydı.
Biraq búgingi quramalı sharayatta sırtqı bazardaǵı jaǵday tez ózgermekte. Bunıń tásirinde eksport bahaları iyirilgen jipte 9 procentke, gezlemede 15 procentke, tayar ónimde 13 procentke túsken. Tiykarǵı eksport bazarlarımızda tayar ónim alıw azayǵan.
Májiliste bul jaǵdayǵa beyimlesip alıw, ishki imkaniyatlardı tolıq iske qosıw ilajları dodalandı.
Yanvar-noyabr aylarında toqımashılıq eksportı 2,6 milliard dollardı quradı. Tarawdaǵı imkaniyatlar esabınan bunı arttırıw múmkin ekenligi atap ótildi.
Dúnya bazarındaǵı talshıqtıń bahası tómenlep baratırǵan sharayatta talshıq hám iyirilgen jipti tereń qayta islewdi kóbeytiw kerek ekenligi atap ótildi. Bunıń ushın tawar islep shıǵarıw hám boyaw kárxanaların qosımsha qollap-quwatlaw ilajları belgilendi. Taraw juwapkerleri aldına iyirilgen jipti qayta islew dárejesin 70 procentke jetkeriw wazıypası qoyıldı.
Sonıń menen birge, bıyıl qoy hám eshki terisi eksportınan 10 procentlik jıyım biykar etilgeni nátiyjesinde 3 million dollarlıq eksport shártnamaları dúzilgen. Bul tájiriybeni kelesi jılı da dawam ettirip, eksporttı arttırıw boyınsha tapsırmalar berildi.
Teri sanaatı kárxanaların shiyki zat penen úzliksiz támiyinlew ilajları hám keleshektegi rejeler boyınsha juwapkerlerdiń esabatı tıńlandı.
Teri sanaatında pishiwshi, tigiwshi, etikshi sıyaqlı orta bólim kadrları jetispey atırǵanı, bul baǵdarda jılına tek ǵana 167 qánige tayarlanıp atırǵanı kórsetip ótildi. Sol sebepli, ayaq kiyim islep shıǵarıw rawajlanǵan Ándijan, Namangan, Ferǵana, Samarqand hám Tashkent wálayatlarındaǵı jetekshi kárxanalardı texnikumlarǵa baylanıstırıp, «dual bilimlendiriw»di jolǵa qoyıw kerek ekenligi aytıldı.
Májiliste kelesi jılǵa mólsherlengen rejeler haqqında da málimleme berildi. Atap ótilgenindey, jeńil sanaat tarmaǵına 2 milliard dollardan aslam sırt el investiciyasın keńnen tartıp, 82 iri joybardı ámelge asırıw hám 25 mıń jumıs ornın jaratıw názerde tutılǵan. Toqımashılıq ónimleri eksportın 4 milliard dollarǵa, teri ónimleri eksportın 250 million dollarǵa alıp shıǵıw maqset etilgen.

ÓzA