Prezident Shavkat Mirzieyov turaq jay qurılısında xalıqtıń qarjıların kepillew sistemasına baylanıslı prezentaciya menen tanıstı.

Mámleketimiz xalqı 37 millionnan astı. Usı jıldıń ózinde 215 mıń shańaraq payda boldı. Álbette, bulardıń barlıǵı turaq jayǵa talaptı kóbeytedi.
Usı jılı 100 mıń kvartiralı kóp qabatlı turaq jaylar tapsırıladı. Kelesi jılı 120 mıń kvartiralı kóp qabatlı jaylar qurılıwı rejelestirilgen.
Sonıń menen birge, talaptıń kópliginen paydalanıp, bul tarawda insapsız biznes islep atırǵanlar da bar. Tólem sistemasınıń tártipke salınbaǵanı, sanlastırıw hám ashıq-aydınlıq joq ekenligi oǵan jol ashıp bermekte. Jańa jaylardı almaqshı bolǵan adamlar pulın bank arqalı emes, tikkeley qurılısshıǵa berip atırǵanı ushın bul qarjılar «saya»da qalmaqta. Kóp jaǵdaylarda jaylardı tapsırıw múddeti keshigip, xalıq tólegen aqshalar «muzlap» tur. Úleslilik shártnamaları hesh jerde dizimge alınbay, tek qurılısshınıń paydasına xızmet etpekte.
Sonıń ushın mámleketimiz basshısı 23-sentyabr kúni qurılıs industriyası boyınsha ótken májiliste turaq jay satıp alıwda xalıqtıń qarjıların kepilleytuǵın sistema jaratıw tapsırmasın bergen edi. Prezentaciyada usı baǵdardaǵı usınıslar kórip shıǵıldı.
Atap ótilgenindey, sırt ellerde «escrow» sisteması tájiriybeden ótken. Oǵan bola, buyırtpashı hám kommerciyalıq bank arasında dúziletuǵın shártnamaǵa tiykarlanıp, hár bir qurılıs imaratı boyınsha «escrow» esap beti ashıladı. Kóshpes múlk ushın kelisilgen qarjılar usı esap bet arqalı ámelge asırıladı. Onda jıynalatuǵın qarjılar tiykarında kommerciyalıq bankler buyırtpashıǵa azaytılǵan procentte kredit beredi. Qurılıs pitkennen soń, qarıydardıń esap betindegi aqsha developer shólkemge ótkeriledi. Qurılısshı esap betinde turǵan qarjılarǵa óndiriw qaratılmaydı.
Prezidentimiz usınıslardı maqullap, bul baǵdarda huqıqıy tiykar jaratıw, usı sistemanı qurılısqa baylanıslı ministrlik hám uyımlarda integraciyalaw boyınsha kórsetpeler berdi.

ÓzA