Paytaxtımızdaǵı Xalıqaralıq biznes orayında tariyxıy áhmiyetke iye bolǵan birinshi Ózbekstan-Xorvatiya biznes forumı bolıp ótti. Bul ilajdıń ótkeriliwi eki mámleket arasındaǵı sawda-ekonomikalıq hám investiciyalıq birge islesiwdi bekkemlew jolında áhmiyetli qádem dew múmkin.
Ózbekstan Respublikası Investiciyalar, sanaat hám sawda ministrligi, Evropa isleri hám sırtqı isler ministrligi tárepinen qáliplestirilgen forumda tiyisli ministrlik hám uyımlardıń basshıları, ózbek isbilermen toparları hám “Apiherbal Ltd”, “Legio Nordica”, “Infobip”, “Podravka”, “Đuro Đaković Montaža-Izolak” sıyaqlı 50 den aslam belgili xorvat kompaniyaları qatnastı.
Forumnıń ashılıw máresiminde investiciyalar, sanaat hám sawda ministri Laziz Qudratov Ózbekstan hám Xorvatiya arasında birge islesiwdi jáne de jedellestiriw, Evropa bazarlarına “GSP+” sisteması arqalı preferencial kiriw imkaniyatlarınan nátiyjeli paydalanıw zárúrligi atap ótildi. Sonday-aq, ol global sanlı transformaciya dáwirinde resurslar hám imkaniyatlardan tolıq paydalanıw áhmiyetli ekenin atap ótti.
Forum sheńberinde sırt elli miymanlarǵa Ózbekstanda isbilermenlik ushın jaratılǵan qolaylı sharayatlar, investiciyalıq potencial, sonday-aq, sanlı texnologiyalar, bilimlendiriw, farmacevtika ónimleri, awıl xojalıǵı hám azıq-awqat islep shıǵarıw tarawlarındaǵı keń imkaniyatlar haqqında tolıq maǵlıwmat berildi.
Sońǵı jılları eki mámleket arasında ekonomika hám salıq tarawlarında birge islesiw baylanısları jedel rawajlanbaqta. Búgingi kúnde mámleketimiz arasındaǵı sawda aylanısı 30 procentke arttı. Bul kórsetkishlerdi jáne de arttırıwda bunday forumlar úlken áhmiyetke iye.
– Biytákirar hám gózzal Tashkent qalasında bolıp turǵanımızdan oǵada quwanıshlımız, – deydi Xorvatiya Sawda sanaat palatasınıń sırt el menen birge islesiw boyınsha direktorı Suzana Knezevich. – Delegaciyamız quramında tek ǵana ministrler emes, al isbilermen topar wákilleri de bar. Búgingi kúnge shekem Ózbekstan menen farmacevtika hám azıq-awqat industriyası tarawlarında birge islesip kelemiz. Bul forum nátiyjesinde birge islesiw baǵdarlarımız jáne de keńeyedi. Bul bolsa eki mámleket ekonomikası hám sawda tarawlarınıń rawajlanıwı ushın áhmiyetli.
Ilaj baǵdarlamasına muwapıq, V2V hám B2G formattaǵı ushırasıwlar ótkerilip, olar arqalı qatnasıwıshlar jańa baylanıslar ornatıw, perspektivalı birgeliktegi joybarlar hám sawda kelisimlerin ámelge asırıw máselelerin dodalaw imkaniyatına iye boldı.
Bir sóz benen aytqanda, bul biznes forum ideyalar hám baslamalar almasıw, sonday-aq, birge islesiwdiń jańa baǵdarların belgilew ushın áhmiyetli platformaǵa aylandı. Forum dawamında erisilgen kelisimler bolsa Ózbekstan hám Xorvatiya arasındaǵı ekonomikalıq qatnasıqlardı jáne de rawajlandırıwǵa tiykar bolıp xızmet etedi.

Gwzal Sattorova, Rustam Nazarmatov (súwret), ÓzA