Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında “Máripat taratıp” joybarı sheńberinde ádebiyat hám mádeniyattı úgit-násiyatlawǵa qaratılǵan gezektegi ilaj ótkerildi.
Filialda belgili shayır, Ózbekstan Jazıwshılar awqamınıń aǵzası, Ózbekstanǵa xızmet kórsetken mádeniyat xızmetkeri hám “Еl-yurt hurmati” ordeni iyesi Gáwhar Ibadullaeva student-jaslar menen dóretiwshilik ushırasıw ótkerip, ol óziniń bay dóretiwshilik hám turmıslıq tájiriybeleri menen ortaqlastı.
Ushırasıwda G.Ibadullaeva óziniń dóretiwshilik jumısları, jazıwshılıq jolında dus kelgen qıyınshılıqlar hám jetiskenliklerin studentlerge aytıp, jazǵan qosıqlarınan oqıp berdi.
— Sizler bir terek bolıń, jaqınlarıńız sayańızda qáterjam bolıp, dem alsın, obrazlıq mániste terek bolıń, tamır jayıń, kewilińizge jaqın insanlarǵa súyenish bolatuǵın kishi bolsa da bir terek bolıwǵa háreket etiń,-deydi shayır.
Ushırasıw pikir-alısıwlarǵa bay bolıp, qatnasıwshılar ózlerin qızıqtırǵan sorawlarǵa juwap aldı.
Ilaj dawamında Qaraqalpaqstan Jazıwshılar awqamınan kelgen jazıwshılar menen birgelikte «Jasıl mákan» ulıwma milliy joybarı sheńberinde filial átirapındaǵı jerlerge sayamanlı terek nálleri otırǵızıldı.
Qaraqalpaqstan xabar agentligi