Qıtaydıń Xidian universiteti tárepinen 2025-jıldan baslap Sanlı bilimlendiriwdi rawajlandırıw orayı menen birgelikte ózbek jasları ushın sanlastırıw tarawına qaratılǵan bilimlendiriw baǵdarlaması jolǵa qoyıladı.
Bul haqqında Sanlı texnologiyalar ministriniń orınbasarı R.Karimjonovtıń Qıtayǵa xızmet saparı sheńberinde Xidian universiteti basshılıǵı menen bolıp ótken ushırasıwda sóz etiledi.
Atap ótiliwinshe, ushırasıwda Ózbekstan hám QXR arasındaǵı birge islesiw baylanısların sanlastırıw, bilimlendiriw hám jańa innovaciyalar arqalı jáne de bekkemlew baǵdarında da óz-ara baylanıslardı jáne de keńeytiw imkaniyatları kórip shıǵılǵan.
Qalaberdi, universitettiń Ózbekstanda óz filialın shólkemlestiriw máselesi de tiyisli dárejede dodalanıp, imkaniyatlar úyrenilip atırǵanı málim etildi hám universtitet tárepinen Ózbekstanda IT bilimlendiriw orayınıń shólkemlestiriliwi boyınsha kelisimge erisildi.
Ministr orınbasarı tárepinen sanlı bilimlendiriwdi rawajlandırıw hám QXRdıń aldınǵı tájiriybesin Ózbekstanda engiziw ushın maman qánigeni ózbek universitetine tartıw usınıs etildi.
Ushırasıw juwmaǵında, universitet Tashkent qalasındaǵı INHA universiteti arasında óz-ara birge islesiw memorandumına qol qoyıldı.
Maǵlıwmat ushın, Xidian universiteti 1931-jılı shólkemlestirilgen bolıp, Qıtaydaǵı jetekshi universitetlerden biri bolıp esaplanadı. Universitet eletronika, telekommunikaciya hám málimleme texnologiyaları tarawlarında kúshli ilimiy bazası menen belgili, dep málimleme beredi xabar.uz
Qaraqalpaqstan xabar agentligi