Sońǵı jılları elimizde bilimlendiriw tarawına ayrıqsha itibar qaratılıp, olardıń materiallıq-texnikalıq bazasın bekkemlew boyınsha kóplegen unamlı isler ámelge asırılmaqta.
Sonıń ishinde bıyılǵı jıldıń ózinde Ózbekstan Respublikası Prezidentiniń 2023-jıl 25-dekabrdegi qararı tiykarında, 2024-jılǵa mólsherlengen «Sociallıq óndiris infrastrukturasın rawajlandırıw» baǵdarlaması sheńberinde Tórtkúl rayonında bir qatar sociallıq obyektlerdiń qurılısı ámelge asırıldı.
Usınday obyektlerdiń biri – rayonlıq Mektepke shekemgi hám mektep bilimlendiriwi bólimine qaraslı 63-sanlı ulıwma orta bilim beriw mektebine ulıwma bahası 2 milliard 200 million sum bolǵan 240 orınlıq qosımsha oqıw imaratı qurıp berilip, Ózbekstan Respublikası gimni qabıl etilgen kúniniń 32 jıllıq bayramı kúni paydalanıwǵa tapsırıldı.
Oqıw imaratınıń tapsırılıwı máresimine rayon hákimi R.Shamuratov qatnasıp, aymaq turǵınları hám mektep jámáátin jańa oqıw imaratınıń tapsırılıwı menen qutlıqlap, olardıń aldaǵı jumıslarına tabıslar tiledi.
Ilajda aymaq jası úlkenleri hám rayon hákimi tárepinen jańa oqıw imaratı aldına tartılǵan dástúriy lenta kesilip, qatnasıwshılar oqıw imaratında oqıwshılar hám pedagoglar ushın jaratılǵan sharayatlar menen jaqınnan tanıstı.
Maǵlıwmat ushın aytatuǵın bolsaq, búgingi kúni bul mektepte 550 oqıwshı oqıp, bilim almaqta.

Adilbay Orazov,
Qaraqalpaqstan xabar agentligi sholıwshısı