Ózbekstan Respublikası Prezidentiniń 2023-jılı Qaraqalpaqstanǵa bolǵan xızmet saparında máhálle jetiligi menen ushırasıp, qaraqalpaq xalqınıń milliy qádiriyatları tiykarında qáliplesken kóshe biylerin tilge alıp, olardıń máhálle jetiligine iyinles bolıwday xızmetlerin atap ótken edi.
Usı ótken jıllar ishinde Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikada dizimge alınǵan 8000 nan aslam kóshe biyleri menen ushırastı hám olar Respublikalıq Máhállelerdi qollap-quwatlaw keńesi tárepinen múnásip túrde materiallıq-ruwxıy jaqtan qollap quwatlanıp kelindi.
Nátiyjede máhálelerde Prezidentimiz tárepinen qabıl etilgen párman hám qararlardıń orınlanıwın úgit-násiyatlawda kóshe biyleri máhálle jetiliginiń shın mánisindegi járdemshisine aylandı. Máhállelerde jámiyetlik qadaǵalaw kúsheyip, óz aldına Biyler institutı júzege keldi. Áhmiyetlisi, Ministrler Kabineti tárepinen olardıń jumısın tártipke salıwshı arnawlı hújjet qabıl etildi.
Aymaqlarda eń belsendi kóshe hám awıl biylerin xoshametlew maqsetinde, usı jıldıń aprel ayında Respublikamızdaǵı 452 máhállerdegi kóshe biyleri arasında máhálle, rayon (qala) hám Respublika basqıshınan ibarat “Eń úlgili kóshe biyi” respublikalıq tańlawı járiyalanǵan edi.
Konstituciya bayramı kúni usı tańlawdıń Qaraqalpaqstan basqıshı jeńimpazları menen Qaraqalpaqstan Respublikası Joqarǵı Keńesiniń Baslıǵı Amanbay Orınbaev ushırasıp, olardı sıylıqladı.
Atap aytqanda, Nókis qalası Náwpir mákan puqaralar jıyınındaǵı «Aqmańǵıt» kóshesiniń biyi Q.Seydametov, Ellikqala rayonı Ibn Sino mákan puqaralar jıyınındaǵı «Ǵafur Ǵulam» kóshesiniń biyi T.Qurbanov, Shımbay rayonı Qarakól mákan puqaralar jıyınındaǵı Q.Ayımbetov kóshesiniń kóshe biyi A.Sarbaev, Beruniy rayonı Gúlistan mákan puqaralar jıyınındaǵı «Ushqın» kóshesiniń biyi X.Ibadullaev hám Xojeli rayonı Abat mákan puqaralar jıyınındaǵı Avtomobil jolı kóshesiniń biyi K.Sadullaevlar
Qaraqalpaqstan Respublikası Máhállelerdi qollap-quwatlaw keńesi tárepinen 20 million sumnan qarjılay xoshametlendi.
Sonday-aq, bir qatar úlgili kóshe biyleri Qaraqalpaqstan Respublikası Joqarǵı Keńesi Prezidumınıń arnawlı qararı tiykarında kókirek belgileri menen sıylıqlandı.
Qaraqalpaqstan xabar agentligi