Ózbekstanda suwık hawa sebepli zapravkalardıń jumısına sheklewler kirgizilmekte. Bul haqqında Еnergetika ministrligi xabar berdi.
Sońǵı kúnlerde respublika aymaǵına suwıq hawa aǵımı kirip keliwi nátiyjesinde energiya resurslarına bolǵan talap sezilerli dárejede artıp barmaqta. Búgingi kúnde xalıqtıń tábiyǵıy gazden kúnlik paydalanıw ótken háptedegige salıstırǵanda 20 procent, elektr energiyasın paydalanıwı bolsa 15 procentke artqan, dep málimleme beredi xabar.uz
Bunday jaǵdayda sistema kárxanaları tárepinen elektr hám gaz uzatıw tarmaqlarındaǵı jumıslardı tez hám sapalı shólkemlestiriw, paydalanıwshılardı energiya resursları menen turaqlı támiyinlew maqsetinde sistemada turaqlı túrde zárúr ilajlar kórip barılmaqta.
Sonıń ishinde, suwıq kúnlerde payda bolıwı múmkin bolgan nasazlıqlardı saplastırıw ushın elektr hám gaz támiynatı kárxanalarında kúni-túni jumıs alıp baratuǵın 1 600 dan artıq arnawlı brigadalar shólkemlestirildi hám olar kerekli avtotransport quralları hám rezerv qurılmalar menen tolıq támiyinlendi.
Maǵlıwmat ushın: elektr támiynatı kárxanalarına 877 avtotransport hám 450 arnawlı texnika, gaz támiyinatına – 220 avtotransport hám 259 arnawlı texnika biriktirilip, 567 kepserlew apparatı menen támiyinlengen.
Xalıq hám sociallıq taraw obyektlerine energiya resursların turaqlı jetkerip beriw boyınsha taraw obyektlerinde 24 saatlıq jumıs rejimine ótilgen bolıp, orınlarda jumıslardıń barısı ústinen turaqlı qadaǵalaw ornatılǵan. Payda bolǵan avariyalıq jaǵdaylardı tezlik penen saplastırıw ilajları kórilip, avariyanı saplastırıwdıń ortasha waqtı ótken jıldaǵı 3-3,5 saattan bıyılǵı jılı 1-1,5 saatqa shekem qısqartıldı.
Sonday-aq, aldınǵı jılları generaciya quwatlıǵı daǵdarısı sebepli májbúriy sheklewler kirgizilgen bolsa, jańadan iske qosılǵan quwatlıqlardıń esabınan bıyılǵı jılı sheklewler kirgiziliwi saplastırıldı.
Hawanıń temperaturasınıń keskin tómenlewi nátiyjesinde paydalanıwshılardıń tábiyǵıy gazge bolǵan talabı kesin artıp, respublika gaz transport sisteması obyektleri maksimal quwatlıqlarda islewine, sonıń menen birge, gazdi jer astı saqlaw qoymaxanalarınan rejelestirilgen maksimal kúnlik gaz alınıwına hám tarmaqqa uzatılıwına qaramastan, qubırlarda gaz basımınıń tómenlewi baqlanbaqta.
Birinshi gezekte xalıqtıń turaq jayların hám sociallıq taraw obyektlerin (medicina, mektep, mektepke shekemgi bilimlendiriw, joqarı bilimlendiriw mákemeleri hám basqalar) tábiyǵıy gaz benen támiyinlew áhmiyetli wazıypamız ekenin inabatqa alıp, aymaqlardaǵı jergilikli hákimlikler menen birgelikte islep shıǵılgan reje-grafiklerge muwapıq, paydalanıw joqarı bolǵan ayırım aymaqlardaǵı avtomobillerge gaz toltırıw kompressor shaqapshaları (gaz zapravkalar) jumısına qısqa múddetli sheklew kirgiziliwi rejelestirilmekte.
Bul boyınsha wálayatlar hám rayonlardıń hákimlikleri rásmiy málimleme dáreklerinde tiyisli tártipte maǵlıwmat berip barıwı jolǵa qoyıladı, delinedi ministrlik xabarında.

Qaraqalpaqstan xabar agentligi