Sporttıń Qol urısı túri boyınsha Qaraqalpaqstan Respublikası Joqarǵı Keńesi Baslıǵınıń kubogi bellesiwleri bolıp ótti.
Búgingi kúnde jaslardıń bos waqıtların mazmunlı ótkeriw, olardı fizikalıq jaqtan shınıqqan kámil insan etip tárbiyalaw, aymaqlarda dene tárbiya hám sporttı rawajlandırıwǵa ayrıqsha itibar qaratılıp kelinbekte.

8-9-dekabr kúnleri Nókis qalasındaǵı 1-sanlı sport mektebinde jaslar hám professional sportshılar arasında qol urısı boyınsha Qaraqalpaqstan Respublikası Joqarǵı Keńesi Baslıǵınıń kubogi bellesiwleri bolıp ótti.
Jarısqa jáhán chempionatı hám xalıqaralıq jarıslardıń jeńimpazları menen birge, kelesheginen úlken úmitler kúttiretuǵın jas sportshılar qatnastı.
Jarıstıń ashılıw máresiminde Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, qatnasıwshılarǵa áwmetler tiledi.
Keskin bellesiwlerge bay bolǵan jarısta sportshılar ózleriniń sheberligin kórsetip, kubok jeńimpazlıǵı ushın óz-ara gúres alıp bardı.
Jarıs sońında jaslar arasında 35 kg salmaqta Miyras Aytbaev, 38 kg da Amangeldi Qasımov, 41kg da Saydakbar Bekchanov, 44 kg da Sultan Uralbaev, 48 kg da Babur Saburov, 52 kg da Aydos Reymbaev, 57 kg da Uluǵbek Qurbaniyazov, 62 kg da Bunyod Ómirbaev, 67 kg da Daniyar Saparbaev, +67 kg da Qállibek Mambetkarimovlar birinshi orındı iyelewge miyasar boldı hám Qaraqalpaqstan Respublikası Joqarǵı Keńesi Baslıǵınıń kubogin jeńip alıwǵa eristi.
Al, professional sportshılar arasında ótkerilgen bellesiwlerde bolsa, 80 kg salmaqta Ózbekstan Respublikası Milliy gvardiyası xızmetkeri Mardon Kamalov, 73 kg da Ózbekstan Respublikası qol urısı federaciyasınan Madatbek Xayrullaevlar jeńip alıwǵa miyasar boldı.
Jarıs sońında jeńimpazlar Qaraqalpaqstan Respublikası Joqarǵı Keńesi Baslıǵınıń kubogi, medal hám estelik sawǵalar menen sıylıqlandı.

Qaraqalpaqstan xabar agentligi