Berdaq atındaǵı Qaraqalpaq mámleketlik universitetinde Ózbekstan hám Qaraqalpaqstanǵa miyneti sińgen mádeniyat xızmetkeri, Qaraqalpaqstan xalıq jazıwshısı, Berdaq atındaǵı mámleketlik sıylıqtıń laureatı M.Nızanovtıń «Tutqın» romanı hám «Iyrim» povestiniń prezentaciyası bolıp ótti.
Onda Qaraqalpaq filologiyası hám jurnalistika fakultetiniń professor-oqıtıwshıları, student-jaslar, jazıwshı-shayırlar qatnastı.
Ilajdı fakultet dekanı, filologiya ilimleriniń doktorı, docent Q.Turdıbaev alıp bardı.
Ilajda jazıwshı óziniń dóretiwshilik jumısı, jańa kitaptı jaratıw processleri, ondaǵı tema hám ideyalar haqqında maǵlıwmatlar berdi. Sonday-aq, studentlerdi qızıqtırǵan sorawlarǵa juwap berip, olarǵa dóretiwshilik hám bilim alıw boyınsha óz másláhátlerin berdi.
Jańa kitap – «Iyrim» shıǵarması XIX ásir ortalarında bolıp ótken turmıslıq waqıyanı tiykar etip alǵan. Ilajda kitaptan úzindiler oqılıp, dodalawlar ótkerildi.
Qaraqalpaqstan jazıwshılar awqamınıń baslıgı K.Karimov shıǵıp sóylep, jańa kitaplar haqqında óziniń unamlı pikirlerin bildirdi. Sonday-aq, Qaraqalpaq ádebiyatı kafedrası docentleri J.Qaniyazova «Tutqın romanındaǵı hayal taǵdiri», J.Sagidullaeva «Ómir iyrimindegi burılıslar» atamasında bayanat jasadı.
Sonday-aq, kitap prezentaciyasında filologiya ilimleriniń doktorı, professor P.Nurjanov, Qaraqalpaqstan xalıq jazıwshısı A.Ábdiev, shayır hám awdarmashı, «Ámiwdárya» jurnalı bas redaktorınıń orınbasarı J.Óteniyazov hám basqalar shıǵıp sóyledi.
Ilaj sońında jazıwshı jas ádebiyatshılar dógeregi aǵzaları jańa shıǵarmalar tuwralı keń túrde pikirlesti.
Qaraqalpaqstan xabar agentligi