Ózbekstan Respublikası Konstituciyası qabıl etilgenliginiń 32 jıllıq bayramı múnásibeti menen Qanlıkól rayonında bir qatar sociallıq obyektler qurıp pitkerilip paydalanıwǵa tapsırılmaqta.

Rayondaǵı Sarı altın awıl puqaralar jıyınındaǵı “Begjap” awılı rayon orayınan derlik 40-45 kilometr alısta jaylasqan elatlı punktlerdiń biri. Bul jerde baslamalı byudjet tiykarında jaslardıӊ bos waqıtların mazmunlı ótkeriw, sporttıӊ ǵalaba en jayıwına erisiw baǵdarında jasıl qaplamalı kishi futbol maydanshası, gandbol, voleybol sport maydanshaları qurıp pitkerildi.
Rayon basshıları, nuranıyları, awıl turǵınları, keń jámiyetshilik wákilleriniń qatnasıwında bul obyektler saltanatlı túrde paydalanıwǵa tapsırıldı.
Máresimge jıynalǵanlardı rayon hákimi B.Sultanov bayram menen qızǵın qutlıqlap, rayonnıń sporttaǵı jetiskenliklerine toqtap ótti. Jas sportshılarǵa sawǵalar tapsırıldı.
Atap ótilgenindey, uzaq awıldaǵı jasıl maydanshalar keleshektegi chempionlardı tayarlaw ushın jaslardı óz qushaǵına shaqırmaqta.
Ilajda aymaq jasları tárepinen bunday múmkinshilikler ushın minnetdarshılıqlar bildirilip, sportta ele de jaqsı nátiyjeler kórsetetuǵınlıǵına isenim bildirildi.

Qaraqalpaqstan xabar agentligi.