Ózbekstan Respublikası Prezidentiniń 2021-jıl 9-avgust kúngi “Jetim balalar hám ata-ana qaramaǵınan ayırılǵan balalardı mámleket tárepinen qollap-quwatlawdıń jańa sistemasın engiziw ilajları haqqında”ǵı qararı hám Ózbekstan Respublikası Ministrler Kabinetiniń 2021-jıl 25-oktyabr kúngi “Jetim balalar hám ata-ana qaramaǵınan ayırılǵan balalardı sociallıq qollap-quwatlawǵa baylanıslı qosımsha ilajlar haqqında”ǵı 656-sanlı qararı tiykarında, respublikamızda kóplegen unamlı isler ámelge asırılıp kelinbekte.
Atap aytatuǵın bolsaq, respublikamızdıń barlıq aymaqlarında usı qarar tiykarında, húkimetimiz tárepinen óz baǵıwshısın joǵaltqan jaslarımız sociallıq jaqtan qollap-quwatlanıp, olardı turaq jay menen támiyinlew máselesine ayrıqsha itibar qaratılmaqta.
Ózbekstan Respublikası Konstituciyası qabıl etilgeniniń 32 jıllıq bayramı qarsańında, usı qarar tiykarında Qaraózek rayonı Mádeniyat awıl puqaralar jıyını turǵını Serik Álibekov ta óz turaq jayına iye boldı.
Usı múnásibet penen rayon hákimi Anvar Baymuratov hám taraw basshıları Mádeniyat elatına barıp, Serik Álibekovqa jańa turaq jaydıń giltin tapsırdı hám oǵan ózleriniń jaqsı tileklerin bildirdi. Ilajda qatnasıwshılar turaq jayda jaslardıń jasawı ushın jaratılǵan sharayatlar menen tanısıp, Seriktiń keleshektegi arzıw-niyetleri boyınsha pikirlesti.
-Men ushın búgin oǵada quwanıshlı kún,-deydi Serik quwanıshtan tolqınlanıp.-Sebebi, Prezidentimiz, respublika hám rayon basshılarınıń bizlerdey jaslarǵa kórsetip atırǵan atalarsha ǵamqorlıqlarınıń arqasında, usınday barlıq qolaylıqlarǵa iye eki xanalı turaq jayǵa iye boldım. Bunıń ushın olarǵa ózimniń tereń minnetdarshılıǵımdı bildiremen.
Bunday iygilikli isler respublikamız boylap dawam etpekte.
Adilbay Orazov,
Qaraqalpaqstan xabar agentligi sholıwshısı