5-dekabr kúni bolıp ótken onlayn aukcionda jámi 4,1 mlrd sumlıq avtonomer satıldı. Bul haqqında respublika tovar-shiyki zat birjası baspasóz xızmeti xabar berdi.
Fizikalıq hám yuridikalıq shaxslar tárepinen satıp alınǵan avtomobil nomerleriniń ulıwma sanı 680di qurap, dúzilgen bir kelisimniń ortasha bahası 6,1 mln sum bolǵan.
Bul sawdalarda eń arzan avtonomerdiń bahası 1,9 mln sum bolsa, eń qımbat nomer 474 mln sumǵa satıldı.
Toǵız ayda birja sawdalarında 152 mıńnan artıq avtomobil nomerleri satılǵan bolıp, olardıń ulıwma bahası 620 mlrd sumdı quraǵan. Avtonomerlerdiń satıp alınıwı 97% fizikalıq, qalǵan 3% bolsa yuridikalıq táreplerge tuwra keledi.
2024-jılı satılǵan eń qımbat avtonomer 517,1 mln sumǵa satıp alınǵan bolıp, onı Tashkent qalasınan yuridikalıq tárep qolǵa kirgizgen. Ekinshi orında 10-iyul kúni 508 mln sumǵa satılǵan avtomobil nomeri turadı.
QMU, jurnalistika qánigeligi
3-b-kurs studenti
I. Uteuliev ,
Qaraqalpaqstan xabar agentligi