Prezident qararı menen komandalıq sport túrlerin rawajlandırıw, talantlı jaslardı saylap alıw sistemasın jetilistiriw hám ǵalabalıq sporttı rawajlandırıw boyınsha jańa ilajlar qabıl etildi. Bul qarar 2025-2026-oqıw jılınan baslap ámelge asırıladı hám sport tarawında bir qatar jańa baslamalardı engiziwdi názerde tutadı.
Bul «Komandalıq sport túrlerin rawajlandırıw hám talantlı jaslardı saylap alıw sistemasın jetilistiriw ilajları haqqında»ǵı Prezident qararı (PQ-421-sanlı, 04.12.2024 j.) menen bekkemlendi.
Qararǵa bola, 2025-2026- oqıw jılınan baslap barlıq mámleketlik universitetlerde voleybol, basketbol, gandbol, regbi, jasıl maydan ústinde xokkey hám suw polosı boyınsha sport klubları shólkemlestiriledi.
Basqa mámleketlik joqarı bilimlendiriw mákemelerinde bolsa keminde úsh komandalıq sport túri boyınsha sport klublarınıń jumısı jolǵa qoyıladı. Sonday-aq, ministrlik hám uyımlar, xojalıq birlespeleri, kommerciyalıq bankler hám kárxanalarda da keminde úsh komandalıq sport túri ushın sport klubların shólkemlestiriw talap etiledi.
2025-2026-oqıw jılınan baslap «Mektep ligası», «Studentler ligası», «Joqarı bilimlendiriw kubogi» hám «Rektor kubogi» sıyaqlı jarıslar turaqlı túrde ótkeriledi. Bunnan tısqarı, jergilikli hákimlikler kesiminde «Hákim kubogi» hám uyımlıq shólkemler arasında «Basshı kubogi» jarısların ótkeriw názerde tutılǵan. Bul jarıslar komandalıq sporttı jáne de ǵalaba en jaydırıwǵa xızmet etedi.
Qararǵa bola, isbilermenlik subyektlerinde komandalıq sport túrleri boyınsha sport klubların shólkemlestiriw xoshametlenedi. Bunday sport klubları arasında «Korporativ sport oyınları»n ótkeriw jolǵa qoyıladı. Bul isbilermenlik subyektleriniń komandalıq sporttaǵı qatnasıwın jaqsılawǵa xızmet etiwi názerde tutılǵan.
Qabıl etilgen qarar komandalıq sport arqalı xalıqtıń salamatlıǵın bekkemlew, sociallıq birge islesiwdi rawajlandırıw hám jaslar arasında komandalıq ruwxın qáliplestiriwge qaratılǵan.
Bul baslamalar Ózbekstanda sporttıń rawajlanıwı hám ǵalaba en jayıwında jańa basqıshtı baslap beredi. Komandalıq sport túrleri keleshekte mámleket sportshılarınıń xalıqaralıq arenalardaǵı jetiskenliklerin arttırıw ushın tiykar jaratadı,-dep málimleme beredi xs.uz saytı.
Qaraqalpaqstan xabar agentligi