Prezidentimizdiń arnawlı qararı menen YuNESKO kóleminde belgilenip atırǵan klassik shayır Ájiniyaz Qosıbay ulınıń dóretpeleri ilimiy jaqtan tereń izertlenip kelinbekte. Solardıń qatarında filologiya ilimleriniń doktorı, professor Gúlmira Qarlıbaevanıń «Ájiniyaz shıǵarmaları tiliniń fonetikalıq hám morfologiyalıq sıpatlaması» (2012), «Ájiniyaz»(basqa avtorlar menen birgelikte, bibliografiyalıq kórsetkish» (2003,2014)) , «Ájiniyaz shıǵarmaları tiliniń semantika –stilistikalıq ózgeshelikleri» (Monografiya, 2017), «Ájiniyaz shıǵarmalarında kórkemlew quralları» (2018) atamalarındaǵı ilimiy miynetleri bar.
Jaqında ilimpazdıń «Bilim» baspasınan «Ájiniyaz shıǵarmaları tili» atamasındaǵı monografiyası basılıp shıqtı. Monografiyada qaraqalpaq xalqınıń ullı klassik shayırı Ájiniyaz Qosıbay ulı (1824-1878) ádebiy miyraslarınıń tili ilimiy jaqtan tereń hám hár tárepleme izertlengen. Atap aytqanda, shayır shıǵarmalarınıń izertleniw jaǵdaylarına sholıw jasalıp, shayırdıń shıǵarmaları tiliniń fonetikalıq ózgeshelikleri, morfologiyalıq qurılısı, sóz jasalıw sheberligi keń túrde analiz etilgen. Monografiyanıń sońǵı babında shayır dóretpeleriniń leksika-semantikalıq hám stilistikalıq ózgeshelikleri izertlengen. Sonday-aq, shayır shıǵarmaları tilin qaraqalpaq tili dialektleri hám házirgi qaraqalpaq tili materiallarına salıstırmalı baǵdarda izertlew tiykarında shayırdıń qaraqalpaq jazba ádebiy tiliniń tariyxındaǵı ayrıqsha ornı anıqlanǵan.
Kitap ilimiy xızmetkerler, izleniwshiler, student-jaslar, qaraqalpaq tiliy oqıtıw sırları hám til bilimine qızıǵıwshılar ushın usınıladı.

Qaraqalpaqstan xabar agentligi.