Senattıń Ilim, bilimlendiriw hám densawlıqtı saqlaw máseleleri komiteti májilisinde «Azıq-awqat qáwipsizligi haqqında»ǵı Nızam dodalandı.
Májiliste bul Nızam azıq-awqat qáwipsizligin támiyinlewde awıl xojalıǵı hám azıq-awqat sanaatı ónimlerin islep shıǵarıw sistemasında isbilermenlik jumısı, sonıń ishinde, islep shıǵarıwshıdan sońǵı tutınıwshıǵa shekemgi processti izbe-iz qadaǵalap barıw sistemasın engiziw ushın quwatlandırıwshı esaplanatuǵını atap ótildi.
Sonday-aq, Nızam menen bir qatar máselelerge anıqlıq kirgizilip atırǵanlıǵı atap ótildi.
Atap aytqanda, Nızamda tiykarǵı túsinikler, yaǵnıy «mámleketlik rezerv», «sociallıq áhmiyetke iye tiykarǵı túrdegi azıq-awqat ónimleri», «azıq-awqat balansı», «azıq-awqat ónimleri hám shiyki zattıń aylanıs rezerv», «azıq-awqat ónimleri jetispewshiligi», «azıq-awqat qáwipsizligi», «qáwipsiz azıqlanıw» hám «shiyki zat» túsiniklerine anıq sıpatlama berilmekte.
Sonday-aq, bul Nızamda azıq-awqat qáwipsizligi tarawındaǵı tiykarǵı principler hám mámleketlik siyasattıń áhmiyetli baǵdarları belgilep berilmekte.
Eń tiykarǵısı, azıq-awqat qáwipsizligi tarawın tártipke salıw bekkemlenbekte. Onda azıq-awqat qáwipsizligin támiyinlewde Ministrler Kabineti, wákillikli mámleketlik uyım, respublikalıq hám jergilikli atqarıw hákimiyatı uyımlarınıń wákillikleri anıq etip kórsetilgen.
Azıq-awqat qáwipsizligin támiyinlew tarawında wákillikli mámleketlik uyım sıpatında Awıl xojalıǵı ministrligi belgilenbekte hám oǵan respublikalıq atqarıw hákimiyatı uyımları hám jergilikli atqarıw hákimiyatı uyımlarınıń azıq-awqat qáwipsizligi tarawındaǵı jumısın muwapıqlastırıw, azıq-awqat ónimlerin hám shiyki zattı islep shıǵarıw menen baylanıslı jumısın qollap-quwatlaw boyınsha usınıslar tayarlaw, azıq-awqat qáwipsizligine unamsız tásir etiwshi faktorlardı úyreniw tiykarında azıq-awqat ónimlerin islep shıǵarıw processlerin jetilistiriw hám rawajlandırıwǵa baylanıslı qısqa, orta hám uzaq múddetli strategiyalardı islep shıǵıw sıyaqlı bir qatar kepillikler berilmekte.
Sonday-aq, Nızamda azıq-awqat ónimleri jetispewshiligine jol qoymaw boyınsha mámleket tárepinen qanday ilajlar kóriletuǵını, azıq-awqat balansın qáliplestiriw, tutınıwshılardıń hám xojalıq júrgiziwshi subyektlerdiń azıq-awqat qáwipsizligi tarawında huqıq hám minnetlemeleri anıq etip belgilep qoyılmaqta.
Nızam dóretiwshileri tárepinen bul Nızamnıń ámeliyatqa engiziliwi mámlekettegi azıq-awqat qáwipsizligi tarawındaǵı baylanıslardı tártipke salıwshı normalardı birden-bir hújjetke unifikaciyalaw hám sistemalastırıwǵa hám usı tarawdaǵı baylanıslardı kompleksli huqıqıy tártipke salıwǵa xızmet etetuǵını atap ótildi.
Dodalaw juwmaǵında Komitettiń tiyisli qararı qabıl etildi, dep málimleme beredi senat.uz saytı.

Qaraqalpaqstan xabar agentligi