Aldan xabar bergenimizdey, usı jıldıӊ 2―5-dekabr kúnleri Túrkiyanıӊ Stambul qalasında TÚRKSOY xalıqaralıq túrkiy xalıqlar mádeniyatı shólkemi menen birgelikte ullı shayırımız Ájiniyaz Qosıbay ulı tuwılǵanınıӊ 200 jıllıǵı keӊ túrde belgilendi.
4-dekabr kúni Stambul qalasındaǵı Bakchilar belediesiniӊ koncert zalında qaraqalpaq hám ózbek kórkem óner sheberleri menen ϴzbekstan mámleketlik filarmoniyası Qaraqalpaqstan Respublikası bólimi dóretiwshilik jámááti tárepinen Ájiniyaz Qosıbay ulınıӊ dóretiwshiligine baǵıshlanǵan «Ayt sen Ájiniyazdıӊ qosıqlarınan» atamasındaǵı koncert baǵdarlaması bolıp ótti.
Ilajǵa TÚRKSOY túrkiy xalıqlar mádeniyat shólkemi baslıǵı Sultan Raev, Bakchilar belediesi hákimligi menen delegaciyamız aǵzaları, túrkiyalı jerleslerimiz hám jaslar qatnastı.
Koncerttiӊ ashılıw máresiminde TÚRKSOY shólkemi baslıǵı Sultan Raev, Qaraqalpaqstan Respublikası Ministrler Keӊesi Baslıǵınıӊ orınbasarı Rasul Zarikeevler sózge shıǵıp, ótkerilip atırǵan ilajdıӊ áhmiyetine keӊ túrde toqtap ótti. Sonday-aq, Qaraqalpaqstan Respublikası Ministrler Keӊesi Baslıǵınıӊ orınbasarı Rasul Zarikeev TÚRKSOY shólkemi baslıǵı Sultan Raevqa Túrkiyada ullı shayırdıӊ dóretiwshiligin úgit-násiyatlawda hám Ájiniyaz Qosıbay ulınıӊ 200 jıllıq yubileyin keӊ túrde belgilewde kórsetken ámeliy járdemi ushın Qaraqalpaqstan Respublikası Joqarǵı Keӊesi Baslıǵınıӊ “Minnetdarshılıq” xatın hám estelik sawǵaların tapsırdı.
Atap ótilgenindey, ϴzbekstan TURKSOY ― túrkiy xalıqlar mádeniyat shólkeminiӊ tolıq huqıqlı aǵzası bolıp, shólkem wákilligi sheӊberinde kóplegen ilajlardı ámelge asırıp, joqarı nátiyjelerge erisilmekte.
Qaraqalpaq xalqınıӊ ullı shayırı hám oyshılı, sonıӊ ishinde túrkiy xalıqlar ruwxıy dúnyasınıӊ jırshısı bolǵan Ájiniyaz Qosıbay ulı tuwılǵanınıӊ 200 jıllıǵı múnásibeti menen ótkerilip atırǵan búgingi ilaj da áne usı jumıslardıӊ úzliksiz dawamı bolıp tabıladı.
Ayrıqsha atap ótiw orınlı, ϴzbekstan Repsublikası Prezidenti Shavkat Mirziyoevtiӊ baslaması menen “Qaraqalpaq xalqınıӊ ataqlı shayırı hám oyshılı Ájiniyaz Qosıbay ulı tuwılǵanınıӊ 200 jıllıǵın keӊ túrde belgilew haqqında” ǵı qararı hám onıӊ YuNESKOnıӊ xalıqaralıq yubileyler rejesine kirgizilgeni, shayır dóretiwshiliginiӊ biybaha miyrası ulıwmainsanıylıq áhmiyetke iye ekenligenen dárek beredi.
Ájiniyaz Qosıbay ulınıӊ shıǵarmaları túrk, túrkmen, qazaq, qırǵız, inglis hám túrkiy tilles xalıqlar tiline awdarma islenip, súyip oqılmaqta.
Tek ǵana Túrkiya Respublikasınıӊ ózinde Túrk akademiyası professorı Xusayn Yildirim tárepinen Ájiniyaz shayır shıǵarmaları túrk tilne awdarma islenip, baspadan shıqqanlıǵın, Pamukqala universiteti professorı Jayhun Vedat Uyǵurdıӊ kóp jıllardan berli qaraqalpaq tili hám ádebiyatın tereӊ izertlep atırǵanlıǵın hám onıӊ “Qaraqalpaqsha túrkshe sózligi” kitap bolıp shıǵarılǵanlıǵın, jaqın waqıtlar ishinde Ankaradaǵı Hajı Bayram Veli, Stambul hám Pamukqala universitetlerinde Ájiniyaz Qosıbay ulınıӊ 200 jıllıǵı keӊ túrde belgilengenligin ayrıqsha atap ótiw orınlı.
ϴtkerilgen koncert baǵdarlamasında elimizge belgili kórkem óner sheberleri tárepinen Ájiniyaz shayır dóretiwshiligine baylanıslı qosıqlar atqarılıp, jıynalǵanlarda ayrıqsha tásir qaldırdı.
Ilaj soӊında respublikamızdıń delegaciya aǵzalarına hám koncert qatnasıwshılarına TÚRKSOY shólkemi tárepinen “Húrmet jarlıq” ları hám estelik sawǵaları tapsırıldı.
Álbette, joqarıda atap ótilgen jumıslar erteӊgi kún tariyx betlerinen orın alıw menen birge, ellerimiz arasındaǵı doslıq hám mádeniy qatnasıqlardıӊ bekkemleniwine tereӊ tiykar jaratadı.
Gúlmira Palwanova,
Qaraqalpaqstan Respublikası mádeniyat ministrliginiń baspasóz xatkeri.
Qaraqalpaqstan xabar agentligi