Nókis rayonı hákimi Z. Zaytovtıń basshılıǵındaǵı delegaciya aǵzaları tájiriybe almasıw maqsetinde awıl xojalıǵı tarawın rawajlandırıw, qayta islew hám qıytaq jerlerden únemli paydalanıw sonday-aq, isbilermenlik subyektleriniń jumısların jolǵa qoyıw maqsetinde ámeliy sapar menen Ferǵana wálayatında boldı.
Delegaciya aǵzaları Ferǵana wálayatı Quva rayonındaǵı nál jetistiriw orınlarında bolıp, bul jerdegi jetistirilgen miywe nálleri hám jańadan jaratılıp atırǵan baǵ orınları menen jaqınnan tanıstı.
Sonday-aq, Quva rayonındaǵı «Qıytaq jer uchastkalarınan nátiyjeli paydalanıw ilimiy-ámeliy orayı»nıń jumısları kózden ótkerildi. Bul jerde 395 gektar jer maydanda shiye, erik, almurt, shabdal hám basqa da miywe túrleri jetistirilip, Rossiya, Qıtay hám Koreya mámleketlerine 1,5 mln dollorlıq eksport etiledi.
Bunnan soń delegaciya aǵzaları «YINGAI AGRO CUL URAL FOOD TECHNOLOGY» óndirislik kárxanasında bolıp, ol jerdegi shárayatlar hám jumıs procesi menen tanıstı. Kárxanada hár qıylı miywe ónimleri qaqlanıp hám qadaqlanıp sırt mámleketlerge hár jılı 300 mln dollorlıq kólemde eksport etilmekte.
Sonıń menen birge, olar «Fruns grant» juwapkershiligi sheklengen jámiyetinde bolıp ol jerdegi jaǵdaylar menen tanısqanda 37 gektar jer maydanǵa tamshılatıp suwǵarıw texnologiyası arqalı intensiv baǵ jaratılǵanınıń gúwası boldı. Bul jerdegi jetistirilgen miywe ónimlerin Rossiya, Norvegiya mámleketlerine eksport etiw jolǵa qoyılǵan.
Al, Altıarıq rayonındaǵı «Xayrulla Baxrom Baymatov» kóp tarmaqlı fermer xojalıǵındaǵı 75 gektar maydanǵa egilgen júzim sortları, kárxana tárepinen ámelge asırılıp atırǵan jumıslar delegaciya aǵzalarında unamlı tásir qaldırdı. Ol jerde mers, avatar, xusayini, manikyur júzim sortları jetistirilip, fermer xojalıǵı tárepinen 2 mln dollor muǵdarında Rossiya mámleketine ónimler eksport etilmekte.

Sapar juwmaǵında Nókis rayonında Ferǵana wálayatı tájiriybesi tiykarında jańadan júzim sortların hám baǵshılıqtı rawajlandırıw boyınsha óz-ara kelisip alındı.
G.Turdıshova, Qaraqalpaqstan xabar agentligi