Hárqanday árman, umtılıw, qızıǵıw  hátteki  pikirlewge  de shańaraq degen dárgaydıń  sebepshi bolıwına jáne bir mártebe  guwa  boldım. Bunda ata-ananıń perzentlerine bolǵan itibarı, hár biriniń oylaw hám pikirlewi, ómir, turmıs, ilim jolı  haqqında sáwbetlesiwleri, qızıǵıwshılıqları itibarǵa alınıp, olar menen sırlas bolıp qollap-quwatlawı  hár qanday insanǵa da tek ǵana talpınıs, kúsh- jiger bere aladı.

Biz sóz etpekshi bolǵan qaharman Jas dóretiwshiler klubınıń aǵzası, izleniwshi, óziniń shayırlıq stiline iye, awdarmashı, bir neshe jaslardıń ustazı da bolıp úlgergen, házirgi kúnde tayanısh doktorant qız – Aygúl Qosımbetova. Ol 1997-jılı Nókis qalasında tuwılǵan.

Úlgili shańaraqtıń tuńǵısh  qızı Aygúl jaslayınan til alǵısh, shaqqan, ómirge talpınıwshań hátteki, ornı kelse jas úlkenlerdey pikirlep, naqıl-maqallardı qosıp óz oyın  bildirer edi. Ilimge qushtar Aygúl  orta mektepti tabıslı tamamlap, ózi niyet etken Berdaq atındaǵı Qaraqalpaq mámleketlik universitetiniń  qaraqalpaq filologiyası hám jurnalistika fakultetine oqıwǵa kiredi. Oqıwdıń dáslepki kúnlerinen baslap-aq, ustazlarınıń bilimi, tájiriybesi tiykarında qızıǵıwshılıǵı jalınlap, qaraqalpaq tili hám ádbiyatına ıqlas qoydı. Ata-anası bolsa, qızınıń ıqlasına, talapshıńlıǵına, izleniwsheńligine isenim menen qaradı. Mehrin bergen tarawına degen talpınısı Aygúldiń úmitlerin jalınlatıp jiberdi.

Insan áste- aqırın miynet etip, umtılsa, árman etken jolları da esigin ashıp barar eken. Joqarı oqıw ornın tamamlaǵan Aygúlde endi ilim jolına qádem taslaw niyeti payda bolıp, magistraturaǵa tapsıradı. Talaplıǵa nur jawar,-degendey ol niyeti de ámelge astı.  Álbette, ul-qızlarınıń jetiskenligin kóriw ata-ana ushın úlken baxıt emes pe… Kewlindegi ármanları maqsetke aylanǵan qaharmanımız tańlaǵan jolınıń mashaqatlarınan seskenbedi. Birneshe ilimiy seminarlarda, konferenciyalarda hátteki, sırt ellerdegi jurnallarda ilimiy maqalaları menen qatnasıp,  qatarınıń aldı bola aldı. 2021-jılı Qırǵız Respublikasında shayır Gúlsayra Momunovanıń jarqın esteligine baǵıshlap ótkerilgen xalıqaralıq tańlawda sıylı 3-orınǵa miyasar boldı. Sonday-aq, «Diaspora Times Global» gazetasınıń 2022-jıl aprel sanında … «Kosymbetova  philologist and journalist»…atamasında qosıqları járiyalandı.  Al, jas talant iyesiniń túrk tilindegi qosıqları bolsa, «Turan edifleri» atamasındaǵı antologiyada jarıq kórdi.

Zamin-2022  jas dóretiwshiler seminarında da belsendilik kórsetip, qosıqları jaslar bayazı kitabınan orın aldı. Ilimiy dóretiwshilik jumıslarında da zamanlaslarınan ozıq shıqqan Aygúl jigirmadan zıyat ilimiy maqalalar dóretti.  Ustazı  f.i.d. professor Sh. Abdinazimov   shákirtine  bilim hám kónlikpeler beriwde  jalıqpastan másláhátler berip bardı.   Shákirtiniń  bunday miynetleri esapqa alınıp Renesans dáwiri ilim izertlew jetekshisi kókirek belgisi menen sıylıqlandı.

-Bul joldı tańlawda ata-anamnıń qolap-quwatlawı, ustazımnıń bergen másláhátleri maǵan túrtki bolıp bara berdi. Hátteki…qatarınan kem bolmasın,qız balaǵoy, oqıtaman, …meniń ilimiy jumısım bir gáp bolar …degen ákemniń gápiniń tórkinine de itibar bermeppen. Mine, endi ózim ilim jolına kirip túsinip atırman.-deydi qaharmanımız.

Sonday-aq shańaraqta, ásirese, qız tárbiyasında ananıń ornı ayrıqsha. Perzentiniń ómirde óz jolın tawıp, keleshekte úlgili kásip iyesi, shańaraq súyenishi bolıwında hám analıq, hám doslıq másláhátlerin ayamaytuǵın, sırlası  Gulnara apa bolsa qızınıń harqanday pikir, usınısların itibarsız qaldırmadı.

-Qızımnıń qosıqlarınıń en birinshi tıńlawshısı hám pikir bildiriwshisi, sonday-aq, onıń poeziyada ózine tán jazıw stili bar ekenligine júdá quwanıshlıman,-deydi perzentine kewli tolǵan Gúlnara apa.

Haqıyqatında da, ata-ana perzent ushın qos qanat. Olar ómiriniń dawamshıları ushın  jaqtılandırıwshı shıraq.

Juwmaqlap aytsaq, jas talant iyesi, izleniwshi, talapshań Aygúlge ele de bálent párwazlar tilep, ushqanda qanatlarıń talmasın,-deymiz .


G. Kudaybergenova.

             Ózbekstan Respublikası IIM Qaraqalpaq
akademiyalıq liceyi  oqıtıwshısı .

   Qaraqalpaqstan xabar agentligi