Bu haqda “Sharq taronalari” XIII xalqaro musiqa festivali matbuot markazida O‘zbekiston Respublikasi madaniyat vaziri matbuot kotibi Sirojiddin O‘sarov ishtirokida o‘tkazilgan matbuot anjumanida ma’lum qilindi.

Qayd etilishicha, bugun boshlangan “Sharq xalqlari musiqa madaniyati: globallashuv jarayonlarida ijodiy uyg‘unlashuv tamoyillari” mavzuida xalqaro ilmiy-amaliy konferensiya davomida Turkiy madaniyat tashkiloti – TURKSOY qoshidagi turkiy davlatlar san’at universitetlari ittifoqining yig‘ilishi bo‘lib o‘tdi.

Unda TURKSOY tashkiloti bosh kotibi Sultan Rayev, Turkiya, Qozog‘iston, Qirg‘iziston, Ozarbayjon, O‘zbekistondagi san’at yo‘nalishidagi oliy ta’lim muassasalari rektorlari ishtirok etdi.

Yig‘ilishda ittifoqqa a’zo oliy ta’lim muassasalari o‘rtasidagi hamkorlikni rivojlantirish, birgalikda qo‘shma loyihalarni amalga oshirish, ilmiy tadqiqot ishlari va kadrlash tayyorlash hamda ularning malakasini oshirish masalalari muhokama qilindi.

Atroflicha muhokamalardan so‘ng Turkiy davlatlar san’at universitetlari ittifoqining rezolyutsiyasi qabul qilindi.

Yig‘ilishda Yunus Rajabiy nomidagi O‘zbek milliy musiqa san’ati instituti ittifoq a’zoligiga qabul qilindi va a’zo oliy ta’lim muassasalari bilan o‘zaro hamkorlik memorandumi imzolandi.

Shuningdek, xalqaro konferensiya davomida Xitoy, Fransiya, Rossiya, Germaniya, Gambiya, Ummon va Iordaniya davlatlaridagi oliy o‘quv yurtlari, xalqaro ilmiy- tadqiqot markazlari yetakchilari o‘rtasida o‘zaro hamkorlik shartnomalari tuzildi.

Mazkur shartnomalarda qo‘shma ijodiy loyihalar, gastrol safarlari, xalqaro festivallar, simpoziumlar, tanlovlar va yozgi (qishki) maktablar tashkil etish, har ikki tomon yetakchi professor-o‘qituvchilari tomonidan mahorat darslari o‘tkazish, nazariy fanlardan ma’ruzalar o‘qish, ilmiy-nazariy konferensiya va simpoziumlar, ilmiy seminarlar, davra suhbatlari va uchrashuvlarda ishtirok etish, ilmiy-uslubiy nashrlar almashinuvi hamda institut professor-o‘qituvchilari malakasini oshirishga ko‘maklashish bo‘yicha hamkorlik aloqalarini o‘rnatish nazarda tutilgan.

G‘.Hasanov, A.Isroilov (surat), O‘zA muxbirlari