Oq uyning chorshanba kuni tarqatgan  xabariga ko‘ra, AQSH prezidenti Donald Tramp Doha shahrida Qatar bilan 1 trillion dollardan ortiq iqtisodiy hamkorlik shartnomasini imzoladi.

– Qatar AQSHdan 96 milliard dollarga 210 ta “Boeing 787 Dreamliner” va “777X” samolyotlarini sotib oladi, –dedi Oq uy ma’muriyati vakili.

Qatar Davlati shuningdek, qariyb 2 milliard dollarga AQSHdan “MQ-9 Reaper” razvedka va zarba beruvchi uchuvchisiz uchish apparatlarini xarid qiladi.

Shartnomaga ko‘ra, Qo‘shma Shtatlar birinchi marta Qatarga dronlarga qarshi kurashish tizimini sotadi. Bu kelishuv qiymati 1 milliard dollarga baholanmoqda.

Avvalroq Oq uy matbuot kotibi Kerolin Levitt Qatar hukumati “Boeing 747-8” samolyotini Pentagon foydalanishi uchun topshirishni taklif qilgani, biroq bu masala hali qonuniy tasdiqlash bosqichida ekanini aytgan edi.

S.Rahimov, O‘zA