Bugungi kunda mamlakatimizda xotin-qizlarning ijtimoiy-siyosiy faolligini oshirish, kasbiy  salohiyatini yuksaltirish, gender  tengligini ta’minlash, ularga munosib turmush va mehnat  sharoitlarini yaratish, har bir jabhada amalga oshirilayotgan islohotlardagi ishtirokini yanada mustahkamlash borasida tizimli  ishlar qilinmoqda.

Bu borada  Prezidentimizning  2022 yil 7 martda  qabul qilingan “Oila va xotin-qizlarni tizimli qo‘llab-quvvatlashga doir ishlarni yanada jadallashtirish chora-tadbirlari to‘g‘risida”gi  farmoni muhim  dasturilamal bo‘lmoqda. Jumladan, farmon bilan tasdiqlangan kompleks chora-tadbirlar  dasturida  yuqori kasbiy salohiyatga  ega, tashabbuskor  islohotlarda faol  ishtirok etuvchi, yosh xotin-qizlarni rahbarlik lavozimiga maqsadli tayyorlash ko‘zda tutilgan.

O‘tgan 2024 yilning avgust-noyabr oylari davomida “Rahbar  ayollar maktabi” dasturining 4-mavsumi uchun nomzodlarni  saralash  bosqichi o‘tkazildi. O‘zbekiston Respublikasi Prezidenti huzuridagi  davlat xizmatini rivojlantirish agentligi, O‘zbekiston Respublikasi Oila va xotin-qizlar qo‘mitasi, vazirlik va idoralar, hududiy  hokimliklar  tashabbusi bilan o‘tkazilgan  mazkur  tanlovda jami 550  nafar  nomzod orasidan  100  nafari tanlab  olindi.

– Ishtirokchilar orasida men ham loyiq deb ko‘rilganim, albatta,  qalbimni faxrga to‘ldirdi, – deydi Xo‘jayli tumani 14-conli maktab direktori, “Vatan fidoiysi”, “Xalq ta’limi a’lochisi” ko‘krak  nishonlari  sohibasi, xalq  deputatlari Xo‘jayli tumani Kengashi  deputati Nargiza Primbetova. Dastur rejasida biz tinglovchilar auditoriya mashg‘ulotlari, mahorat darslari, mahalliy hokimliklarda  amaliyot o‘tash, loyiha ishlarini tayyorlash, uni himoya qilish kabi muhim  vazifalarni  bajardik. Ushbu  o‘quv mashg‘ulotlari  respublika,  vazirlik va  idoralar  rahbarlari tomonidan  olib  borildi.

Tarixni anglash o‘zlikni anglash demakdir. Shu o‘rinda o‘tmishga  nazar solsak. Sharq xalqlarida azal-azaldan ayolga e’zoz-ehtirom  ko‘rsatilgan. Ularning  matonati, sadoqati,  tadbirligi, oila  va davlat ishlaridagi zukkoligi, donoligi e’tirof etilgan. To‘maris, Bibixonim,  Nodirabegim, Qumar onalarning donoligi, zukkoligi, shijoati  bugungi  avlodlar uchun beixtiyor buyuk tarbiya maktabi bo‘lmoqda. Bu ulug‘ zotlarning hayot yo‘li har birimizning qalbimizda faxr-iftixor  uyg‘otib, Vatanga muhabbat, sadoqat, buyuk o‘tmishimizga, milliy qadriyatlarimizga nisbatan hurmat hissini oshirmoqda.

Xalq deputatlari Xo‘jayli  tumani Kengashi  deputati sifatida  aholi bilan ishlash, ularning hayotiy, zarur ehtiyojlari, yechimini  kutayotgan  muammo va masalalarni ijobiy hal etishda mazkur o‘quv  mashg‘ulotlarida  olgan bilimlarim, tajribalarim as qotadi.

Xulosa o‘rnida  aytmoqchimanki,  bugun shiddat bilan  o‘zgarayotgan, rivojlanayotgan davr har birimizdan  yangicha fikrlash, zamon  bilan  hamnafas bo‘lishni  talab etmoqda.  Shunday ekan,  mazkur o‘quv dasturi  ham  jamiyatimizda xotin-qizlar  imkoniyatlarini  yuzaga chiqarishda  muhim  ahamiyat kasb etadi.

Dovud Abibullayev,

O‘zA muxbiri