Mahoratli kasb egalari tanlovi
Samarqandda 29-31 yanvar kunlari “Worldskills Samarkand-2025” V Milliy kasblar chempionati o‘tkazilmoqda.
Samarqand shahridagi yoshlar markazida chempionatning ochilish marosimi bo‘lib o‘tdi.
Davlatimiz rahbarining 2024 yil 16 oktyabrdagi “Kasbiy ta’limda malakali kadrlar tayyorlash tizimini yanada takomillashtirish va xalqaro ta’lim dasturlarini joriy qilish chora-tadbirlari to‘g‘risida”gi farmonida kasbiy ta’lim muassasalarida tayyorlanayotgan o‘rta bo‘g‘in kadrlarini xalqaro ta’lim standartlari asosida tarbiyalash maqsadida texnikum o‘quvchilarining kasblar bo‘yicha xalqaro musobaqalarda ishtirokini ta’minlash vazifasi belgilangan.
Mazkur topshiriq ijrosini ta’minlash maqsadida Samarqand viloyati oliy ta’lim, fan va innovatsiyalar boshqarmasi tashabbusi bilan Oliy ta’lim fan va innovatsiyalar vazirligi hamda “Worldskills Uzbekistan” ishchi kasblarni rivojlantirish va ommalashtirish assotsiatsiyasi bilan hamkorlikda “Worldskills Samarkand-2025” V Milliy kasblar chempionati tashkil etildi.
Chempionatning ochilish marosimida Samarqand viloyati hokimi vazifasini bajaruvchi Adiz Boboyev, Oliy ta’lim, fan va innovatsiyalar vazirining birinchi o‘rinbosari Shohrux Daliyev, Ishchi kasblarni rivojlantirish va ommalashtirish assotsiatsiyasi boshqaruv raisi Farruxjon Jo‘rayev, Shveysariyaning O‘zbekistonda kasbiy ta’lim islohotlarini qo‘llab-quvvatlash loyihasi rahbari Simone Strasburger va boshqalar so‘zga chiqib, ishtirokchilarga muvaffaqiyat tiladi.
Shuningdek, 2022 yilning oktyabr oyida Fransiyaning Bordo shahrida bo‘lib o‘tgan 46-xalqaro “Worldskills” chempionati g‘olibi Akbar Abdurahimov so‘zga chiqib, ishtirokchilarga omad tiladi va xalqaro maydondagi muvaffaqiyatlarni davom ettirish lozimligini ta’kidladi.
“WorldSkills” musobaqasi ilk bor 1947 yilda Ispaniyada Ikkinchi jahon urushi natijasida vayron bo‘lgan davlatlarning ayrimlarida yoshlar uchun yangi ish o‘rinlarini yaratish maqsadida tashkil etilgan. Ishchi kasblar bo‘yicha jahon chempionati har ikki yilda bir marta o‘tkaziladi va “ishchilar uchun olimpiada” deb ham nomlanadi. Unda 22 yoshgacha bo‘lgan yigit-qizlar ishtirok etadi.
“Worldskills Samarkand-2025” V Milliy kasblar chempionatida yurtimizdagi 66 ta texnikumning eng mohir o‘quvchilari ishtirok etmoqda. Maqsad eng mahoratli mutaxassislarni rag‘batlantirish hamda joriy yilning 23-27 noyabr kunlari Tayvanda tashkil etiladigan “WorldSkills Asia Competition Taipei 2025” xalqaro kasblar chempionatida ishtirok etadigan ishtirokchini aniqlashdan iborat.
Ochilish marosimi konsert dasturi bilan davom etdi.
G‘.HASANOV, A.ISROILOV (surat), O‘zA muxbirlari