YUNESKOning Parijdagi bosh qarorgohida Madaniyat va san’atni rivojlantirish jamg‘armasi raisi Gayane Umerovaning YUNESKO bosh direktori o‘rinbosari Gabriela Ramos bilan uchrashuvi bo‘lib o‘tdi.

Uchrashuv davomida Abu Rayhon Beruniy nomidagi YUNESKO – O‘zbekiston xalqaro mukofoti faoliyatini yo‘lga qo‘yish va ilk taqdirlash marosimini YUNESKO Bosh konferensiyasining 43-sessiyasi doirasida Samarqandda o‘tkazish masalalari muhokama qilindi.

Shuningdek, YUNESKOning gender tenglik masalalari bo‘yicha direktori Begoniya Lasagabaster bilan o‘tkazilgan ishchi uchrashuvlarda xotin-qizlarni qo‘llab-quvvatlash sohasidagi hamkorlikni mustahkamlash, ularning madaniyat, ta’lim va ijtimoiy tashabbuslardagi ishtiroki kabi dolzarb masalalar muhokama qilindi.

“O‘zbekiston-2030” strategiyasi doirasida madaniyat, san’at va raqamli texnologiyalar sohalarida xotin-qizlarning roli haqidagi tashabbuslar taqdim etildi. Kreativ soha tarmoqlarida ayollar yetakchiligini rivojlantirish, ularning raqamli muhitdagi ishtiroki, shuningdek, madaniyat sohasida kasbiy kamolotga yetishlari uchun shart-sharoitlar yaratish yuzasidan loyihalar to‘g‘risida so‘z yuritildi.

O‘zbekiston sun’iy idrok texnologiyalariga tayyorligi to‘g‘risidagi YUNESKO hisoboti, mamlakatimizning YUNESKO Yoshlar anjumanidagi ishtiroki va YUNESKOning bosh qarorgohida “O‘zbekiston – Buyuk Ipak yo‘li chorrahasida” ko‘rgazmasini tashkil etish tashabbuslariga alohida e’tibor qaratildi.

N.Ziyodullayeva,

O‘zA