Joriy yilning 10-12 yanvar kunlari Gruziyaning Tbilisi shahrida Karate WKF bo‘yicha “A seria” musobaqasi o‘tkaziladi. Unda dunyoning 87 mamlakatidan jami 1 ming 173 nafar karate ustalari 14 ta vazn toifasida bahs olib boradi.
Jahon reyting ballarini beruvchi ushbu musobaqada Sulaymon Yusupov boshchiligidagi O‘zbekiston terma jamoasi a’zolari ham ishtirok etadi.
Ayni damda Tbilisi shahrida bo‘lib turgan terma jamoamiz a’zolari, Sulaymon Yusupov (bosh murabbiy), G‘ofurjon Zohidov, Iqboljon Uzoqov kabi tajribali murabbiylar qo‘l ostida musobaqa oldidan so‘nggi tayyorgarlik mashg‘ulotlarini o‘tkazmoqda. Karatechilarimiz mashg‘ulotlar davomida jismoniy holatni bir maromda ushlab turuvchi, texnik va taktik hamda tezkorlikni oshirish mashqlarini bajarmoqda.
Darvoqe, “A seria” musobaqasida hakamlarimizdan Azizbek Bo‘riyev va Bobur Davlatov bellashuvlarni boshqarib boradi.
Javohir Toshxo‘jayev, O‘zA