Shu kunlarda 2025 yilning ilk eng nufuzli musobaqalaridan biri bo‘lgan “Freestyle Chess Grand Slam Tour-2025” turnirining so‘nggi ishtirokchilarini aniqlash bo‘yicha onlayn saralash musobaqalari o‘tkazilmoqda.
Joriy yilning 7-14 fevral kunlari Germaniyaning Vaysenxaus shahrida o‘tadigan mazkur nufuzli turnirning 9 nafar ishtirokchisi ma’lum. Turnir ishtirokchilari: Magnus Karlsen, Gukesh, Fabiano Karuana, Xikaru Nakamura, Nodirbek Abdusattorov, Alireza Firuzja, Levon Aronyan, Vinsent Keymer va Vishvanatan Anand.
Turnirning so‘nggi o‘ninchi qatnashchisini aniqlash maqsadida o‘tayotgan saralash o‘yinlarida dunyoning yetakchi shaxmatchilari qatorida o‘zbekistonlik Javohir Sindorov va Shamsiddin Vohidov ham qatnashmoqda.
“Freestyle Chess Grand Slam” turnirining ortda qolgan saralash musobaqalarida grossmeyterimiz Javohir Sindorov 20 nafar shaxmatchi orasida 7,5 ochko bilan pley-off bosqichiga yo‘l oldi. Sindorov 6 g‘alaba va 3 durang bilan qo‘shimcha ko‘rsatkichlar evaziga 3-o‘rinni egalladi. 7 ta g‘alaba, 1 ta durang va 1 ta mag‘lubiyat qayd etgan rossiyalik Denis Lazavik 7,5 ochko bilan 2-o‘rinni, sloveniyalik Vladimir Fedoseyev 8 ochko bilan 1-o‘rinni egalladi.
Javohir Sindorov pley-off bosqichining 1/8 finalida xitoylik I Veyni 1,5:0,5 hisobida yengdi. Chorak finalda hindistonlik Rameshbabu Praggnanandxaga hech qanday imkoniyat qoldirmadi – 2:0.
Bugun, 8 yanvar kuni 1/2 finalda Javohir yana bir xitoylik shaxmatchi Yu Yang Yi bilan ro‘baro‘ kelsa, ikkinchi yarim finalda FIDE bayrog‘i ostida saralashda qatnashayotgan Yan Nepomnyashiy Sloveniya vakili Vladimir Fedoseyev bilan kuch sinashadi. Shundan so‘ng g‘oliblar o‘rtasida final bahsi o‘tkaziladi.
G‘olib shaxmatchi fevral oyida bo‘lib o‘tadigan “Freestyle Chess Grand Slam Tour-2025” turnirining asosiy bahsida o‘ninchi shaxmatchi sifatida qatnashish imkonini qo‘lga kiritadi. Mazkur saralash turnirida ishtirok etgan hamyurtimiz Shamsiddin Vohidov 9 imkoniyatdan 6 ochko to‘plab, 19-o‘rin bilan kifoyalandi.
Eslatib o‘tamiz, “Freestyle Chess Grand Slam Tour-2025” turnirining umumiy mukofot jamg‘armasi 750 ming AQSH dollaridan iborat bo‘lib, uning 88 foizi asosiy tur ishtirokchilari, qolgan 12 foizi saralash bahslarida qatnashgan shaxmatchilar o‘rtasida taqsimlanadi.
T.Ro‘ziyev, O‘zA