Bugun, 26 dekabr kuni AQSHning Nyu-York shahrida shaxmatning rapid va blits yo‘nalishlari bo‘yicha jahon chempionati bahslari boshlanadi.
Dunyoning ko‘zga ko‘ringan shaxmatchilari ishtirok etadigan nufuzli musobaqada O‘zbekiston terma jamoasining yetakchi grossmeysterlari Nodirbek Abdusattorov, Shamsiddin Vohidov, Javohir Sindarov, Jahongir Vohidov va Muhiddin Madaminov erkaklar o‘rtasidagi musobaqalarda dona sursa, Afruza Hamdamova ayollar o‘rtasidagi kurashlarda vatanimiz sharafini himoya qiladi.
Jahon chempionatida rapid va blits yo‘nalishlari bo‘yicha amaldagi jahon chempioni Magnus Karlsen, yetakchi shaxmatchilar Fabiano Karuana, Alireza Firuzja, Xikaru Nakamura qatorida 300 nafar ishtirokchi Nyu-York shahrida kechadigan aql janglarida ishtirok etadi.
Bugun rapid yo‘nalishidagi 1-5-tur o‘yinlari bo‘lib o‘tadi. Ertaga, 27 dekabr kuni 6-9-tur, 28 dekabr kuni 10-13-tur uchrashuvlari tashkil etilsa, 29 dekabr ishtirokchilar uchun dam olish kuni sifatida belgilangan.
30 dekabr kuni esa jahon chempionatining blits bahslari bo‘lib o‘tadi. 31 dekabrda chorak final, yarim final hamda final musobaqalari o‘tkazilib, g‘olib va sovrindorlar aniqlanadi.
T.Ro‘ziyev,
O‘zA