Futbol bo‘yicha har qanday musobaqa katta qiziqish bilan kuzatilishi shubhasiz. Biroq, Yevropa qit’asining kuchli beshlik chempionatlariga bo‘lgan qiziqish ko‘proq e’tibor markazida bo‘ladi.
Futbol sharhimizda Ispaniya, Angliya, Fransiya, Italiya va Germaniya chempionatlarida qayd etilgan so‘nggi natijalar bilan sizlarni tanishtirib o‘tamiz.
Ispaniya La Ligasining 18-turidan o‘rin olgan “Real Madrid” va “Sevilya” uchrashuvi 4:2 hisobida yakunlandi. Mazkur g‘alabadan so‘ng “Qirollik klubi” ochkolari sonini 40 taga yetkazib oldi va turnir jadvalida 2-o‘ringa ko‘tarildi.
Musobaqa peshqadamlari o‘rtasidagi o‘yinda kutilmagan natija qayd etildi. Gap shundaki, bu turdan o‘rin olgan “Barselona” va “Atletiko” uchrashuvida mehmonlar muhim g‘alabani qo‘lga kiritdi. Dastlab, uchrashuvda mezbonlar vakili Pedri 30-daqiqada hisobni ochgan bo‘lsa, “Atletiko” futbolchisi De Paul 60-daqiqada hisobni tenglashtirdi. 90+6-daqiqada Aleksander Syorlot gol urgan holda hisobni 1:2 ko‘rinishiga olib keldi va “Atletiko” g‘alabasini ta’minladi.
Mazkur natijadan so‘ng, “Barselona” La Liga turnir jadvalida 19 o‘yinda 37 ochko jamg‘arib, 3-o‘ringa tushib ketdi. “Atletiko” esa 18 ta o‘yinda 41 ochkoga ega chiqqan holda peshqadamga aylandi.
Shuni ta’kidlab o‘tishimiz lozimki, bundan oldingi turlarda Xansi Flik qo‘l ostidagi “Barselona” jamoasi “Las-Palmas” (1:2) va “Leganes”ga (0:1) imkoniyatni boy berdi. Bu kabi holat klub tarixida ikkinchi marotaba sodir bo‘ldi. Birinchi bor Kataloniya klubi 1965 yil La Ligada ketma-ket uch marotaba mag‘lub bo‘lgan edi.
La Liganing 18-turida quyidagi natijalar qayd etildi: “Xetafe” – “Malorka” 0:1, “Selta” – “Real Sosedad” 2:0, “Osasuna” – “Atletik Bilbao” 1:2, “Jirona” – “Valyadolid” 3:0, “Valensiya” – “Alaves” 2:2, “Leganes” – “Vilyarreal” 2:5, “Las-Palmas” – “Espanol” 2:5, “Betis” – “Rayo Valekano” 1:1.
Musobaqaning 19 tur uchrashuvlari 11-14 yanvar kunlari bo‘lib o‘tadi.
Angliya premer ligasining 17-turida “Manchester Yunayted” klubi “Old Trafford” stadionida “Bornmut” jamoasini qabul qilib, kutilmaganda 0:3 hisobida mag‘lubiyatga uchradi. “Vulverxempton” safarda “Lester” ustidan yirik 3:0 hisobda zafar quchdi. “Everton” hamda “Chelsi” uchrashuvida hisob ochilmadi.
Turning markaziy uchrashuvi deya e’tirof etilgan “Tottenxem” – “Liverpul” bahsida muxlislar 9 ta gol guvohiga aylandi. “Hotspur” stadionida o‘tgan o‘yinda “Liverpul” Saloh va Diasning dubli, Makalister hamda Soboslaining bittadan goli evaziga mezbonlarni 6:3 hisobida taslim qildi.
“Kristal Pelas” esa “Arsenal”ga qarshi o‘z uyida o‘yin o‘tkazdi. Mezbonlarning yagona goliga mehmonlar 5 ta gol bilan javob qaytardi. Shuningdek, bu turdagi qolgan uchrashuvlarda quyidagi natijalar qayd etildi: “Ipsvich” – “Nyukasl” 0:4, “Aston Villa” – “Manchester Siti” 2:1, “Brentford” – “Nottingem Forrest” 2:1, “Vest Xem” – “Brayton” 1:1, “Fulxem” – “Sautgempton” 0:0.
Shu tariqa, “Liverpul” 16 o‘yinda 39 ochko jamg‘arib, jadvalda karvonboshilik qilayotgan bo‘lsa, “Chelsi” va “Arsenal” 17 o‘yin yakuniga ko‘ra 35 hamda 33 ochko bilan kuchli uchlikni yakunladi. 18-tur o‘yinlari 26-28 dekabr kunlari tashkil etiladi.
Darvoqe, bu hafta yakunida Fransiya kubogi o‘tkazildi. Biz uchun ahamiyatli o‘yin, albatta, “Lans” – “PSJ” klublari bahsi bo‘ldi. Kubokning 1/32 final bosqichidan o‘rin olgan o‘yinning 66-daqiqasida hamyurtimiz Abduqodir Husanovning zarbasidan so‘ng to‘p Nzolaga tegib gol bo‘ldi. Oradan ko‘p o‘tmay Ramush hisobni tenglashtirdi va g‘olib jamoa nomi penaltilar seriyasida aniqlandi. Penaltilar seriyasida esa parijliklar 3:4 hisobida ustun keldi. Yevropaning turli jamoalari o‘z tarkibiga qo‘shishni istayotgan Abduqodir Husanovga uchrashuvda 7 ball qo‘yildi.
Endi esa Italiya A Seriyasining 17-turidan o‘rin olgan uchrashuvlarga e’tibor qaratamiz. “Roma” o‘z maydonida “Parma”ni 5:0 hisobida taslim qildi. Shuningdek, ushbu turda “Torino” – “Bolonya” 0:2, “Jenoa” – “Napoli” 1:2, “Lechche” – “Latsio” 1:2, “Venetsiya” – “Kalyari” 2:1, “Atalanta” – “Empoli” 2:1 va “Monsa” – “Yuventus” 1:2 hisoblari qayd etildi.
17-tur yakunlariga ko‘ra “Atalanta” 40 ochko bilan birinchi, “Napoli” 38 ochko jamg‘arib ikkinchi, “Inter” 34 ochkoni qo‘lga kiritib, uchinchi pog‘onaga joylashdi.
Germaniya Bundesligasi 15-turida “Ayntraxt” o‘z maydonida 1:3 hisobida “Mayns” klubiga imkoniyatni boy berib qo‘ygan bo‘lsa, “Bayer” 5:1 hisobida “Frayburg”ni taslim qildi. Musobaqa peshqadami bo‘lib turgan “Bavariya” “Allianz Arena” stadionida “RB Leypsig” ustidan 5:1 hisobidagi g‘alabaga erishdi.
O‘tkazilgan tur yakunlariga ko‘ra, “Bavariya” 36 ochko bilan jadvalning birinchi o‘rnidan joy oldi. “Bayer” 32 ochko bilan ikkinchi, “Ayntraxt ” esa 27 ochko to‘plab, uchinchi pog‘onani egalladi.
Javohir Toshxo‘jayev,
O‘zA