Gruziyada yangi Prezident inauguratsiyasi bir haftadan keyin, ya’ni 29 dekabrga belgilangan. Ushbu sana yaqinlashgan sari mamlakatda siyosiy vaziyat tobora qizimoqda. Kecha poytaxtda yana norozilik namoyishi bo‘lib o‘tdi. Mamlakat yetakchisi omma qarshisida hukumatga yangidan parlament saylovini tayinlashni buyurdi. Mazkur xabarni “Sputnik-Gruziya” agentligi tarqatgan.
– Gruziya Prezidenti Salome Zurabishvili Tbilisidagi parlament binosi yonida uyushtirilgan norozilik mitingida hukumatga hamda shaxsan hukmron “Gruziya orzusi” partiyasi asoschisi va faxriy raisi Bidzin Ivanishviliga mamlakatda qaytadan parlament saylovini o‘tkazish uchun 29 dekabrga qadar bir hafta muhlat berdi, – deyilgan materialda.
Ma’lumki, Respublikada 26 oktyabr kuni o‘tgan parlament saylovidan buyon poytaxt ko‘chalarida ommaviy norozilik to‘xtamayapti. Muxolifat ovoz berish natijasini inkor etib, tarafdorlarini mitingga chorlab kelyapti.
14 dekabrda esa mamlakat parlamenti hukmron “Gruziya orzusi” partiyasidan ko‘rsatilgan nomzod Mixail Кавелашвилини yangi Prezident etib sayladi. Ushbu voqea namoyish to‘lqinini yanayam kuchaytirdi.
Zurabishvili ikkala saylov natijalarini ham tan olmadi. U lavozimini tark etmasligi haqida bayonot berib, o‘zini hokimiyatning yagona qonuniy vakili, deb hisoblashini e’lon qildi.
Ommaviy axborot vositalari yozishicha, Prezident yakshanba kuni navbatdagi namoyishda qatnashib, nutq so‘zlamoqchi bo‘lganda, mikrofon o‘chib qolgan. Shundan so‘ng u megafonda ishlashga har qanday yo‘l bilan to‘siq qo‘yishga harakat qilishayotganini aytgan.
Shu kuni Bosh vaziri Irakliy Kobaxidze Zurabishviliga ikki holatda, ya’ni amaldagi Prezident yangi parlament saylovi muddatini belgilasa yoki 29 dekabr kuni yangi davlat rahbari inauguratsiyasidan keyin qarorgohni tark etmasa, jinoiy javobgarlikka tortilishi bilan tahdid qilgan. Bunga javoban, Zurabishvili “Ular tez orada meni panjara ortiga tushirish va’dasini berishdi, lekin biz qo‘rqmaymiz”, deya, vatani, xalqi, armiyasi va konstitutsiyasiga sodiq qolishini bildirdi.
S.Rahimov, O‘zA