Bugun, 17 dekabr kuni poytaxtimiz Toshkentda O‘zbekiston Respublikasi Prezidenti sovrini uchun jahon professionallar seriyasi (“World Seriyes Pro”) turnirining final bahslari bo‘lib o‘tadi. “Universal sport saroyi”da o‘tkaziladigan ushbu nufuzli musobaqada dunyoning eng kuchli polvonlari 10 ta vaznda – erkaklar -66, -73, -81, -90, -100, +100 kilogrammda, ayollar -52, -63, -78, +87 kilo og‘irlikda o‘zaro kuch sinashadi.
Sovrin jamg‘armasi 170 ming AQSH dollaridan iborat turnirda ishtirok etadigan bir qator davlatlarning sport delegatsiyalari yurtimizga yetib keldi.
Kecha mazkur nufuzli musobaqa oldidan o‘tkazilgan matbuot anjumanida sport vaziri o‘rinbosari Shahrullo Mahmudov, Xalqaro kurash assotsiatsiyasi bosh kotibi Reza Nosiri, O‘zbekiston kurash federatsiyasi raisining birinchi o‘rinbosari Baxtiyor Qodirov, Yevropa, Afrika kurash konfederatsiyalarining mutasaddilari jurnalistlarning savollariga javob berish jarayonida ikki yildan beri o‘tkazib kelinayotgan turnirning ahamiyati, turnirda sportchilarning ishtirok etish tartibi va boshqa masalalar xususida so‘z yuritdi.
Ta’kidlanganidek, “World Seriyes Pro” turnirida O‘zbekiston, Janubiy Afrika, Eron, Tojikiston, Hindiston, Rossiya, Moldova kabi davlatlarning yetakchi kurashchilari qatnashadi.
– Xalqaro kurash assotsiatsiyasi taqvimidagi eng yirik bo‘lgan mazkur turnirda kurashchilar reyting ochkosi asosida ishtirok etadi. Unga ko‘ra, mamlakatimiz sharafini 12 nafar sportchi himoya qilish huquqini qo‘lga kiritgan. Mahoratli kurashchilarimizdan Otabek Hasanov, Arslon Tojiyev, Umar Bozorov, Erkin Qozoqov, Shermuhammad Jangriyev, Jamshid Mamatrahimov, Muhsin Hisomidinov, Muhammadkarim Xurramov erkaklar o‘rtasidagi bellashuvlarda gilamga chiqsa, qizlarimizdan Hilola Ortiqboyeva, Filura Ergasheva Komila Qahhorova, Yulduz Muhammadiyeva singari polvon qizlarimiz g‘oliblik uchun kurash olib boradi, – deydi kurash bo‘yicha O‘zbekiston terma jamoasi bosh murabbiyi Rizamat Soliyev.
Eslatib o‘tamiz, har bir vaznda g‘oliblikka erishgan sportchi 10 ming, 2-o‘rin sohiblari 5 ming va 3-o‘rinni qo‘lga kiritganlar 1 ming AQSH dollari bilan taqdirlanadi.
T.Ro‘ziyev, O‘zA