Bahrayn poytaxti Manama shahrida og‘ir atletika bo‘yicha kattalar o‘rtasidagi jahon chempionati o‘z nihoyasiga yetdi.

Murosasiz va shiddatli kechgan dunyo birinchiligi yakunlariga ko‘ra, O‘zbekiston terma jamoasi 3 ta oltin, 1 ta kumush hamda 2 ta bronza, jami 6 ta medalga ega chiqqan holda 70 ga yaqin mamlakatlarning milliy terma jamoalari orasida umumjamoa hisobida Qozog‘iston terma jamoasi bilan birgalikda kuchli uchlikdan joy egalladi.

Aytish lozim, Manamadagi jahon chempionatida -89 kilogrammda Sarvarbek Zafarjonov dast ko‘tarishda bronza medal, -81 kilogrammda Muhammadqodir Toshtemirov dast ko‘tarishda bronza va ikki kurashda kumush, -109 kilogrammda Ruslan Nuriddinov siltab ko‘tarish va ikki kurashda, Sharofiddin Amriddinov dast ko‘tarishda oltin medallarga sazovor bo‘ldi.

Medallar jamg‘arish borasida 1-o‘rinni Shimoliy Koreya, 2-o‘rinni Xitoy terma jamoasi band etdi.

T.Ro‘ziyev, O‘zA