Joriy yil 16 noyabr kuni Qoraqalpog‘iston san’at saroyida atoqli qoraqalpoq shoiri va mutafakkiri Ajiniyoz Qo‘siboy o‘g‘li hayoti va faoliyati haqida hikoya qiluvchi “Ajiniyoz” badiiy-publitsistik filmining taqdimoti bo‘lib o‘tdi.
Unda Qoraqalpog‘iston Respublikasi Jo‘qorg‘i Kengesi Raisi Amanbay Orinbayev so‘zga chiqib, davlatimiz rahbarining tashabbusi bilan buyuk mutafakkir tavalludining 200 yilligi YUNESKO doirasida nishonlanadigan xalqaro yubileylar qatoriga kiritilgani, Ajiniyoz Qo‘siboy o‘g‘lining nomini abadiylashtirish bo‘yicha qator ishlar amalga oshirilayotganini ta’kidladi.
Ta’kidlanganidek, “Ajiniyoz” badiiy-publitsistik filmi uchun davlat byudjeti hisobidan 3 milliard so‘m mablag‘ ajratilib, bu qoraqalpoq kino tarixida ilk bor qisqa muddatda suratga olingan film bo‘ldi.
Ushbu film buyuk shoirning bolalik va yoshlik yillarini, ijod yo‘lini, o‘sha davr hayotini aks ettirib bera oldi desak, mubolag‘a bo‘lmaydi. Yana bir muhim jihati, film 19 noyabr kuni Toshkent shahridagi O‘zbekiston milliy kino san’ati saroyida ham namoyish etiladi.
Dovud Abibullayev, Maqsad Habibullayev (surat), O‘zA