Samarqand davlat veterinariya meditsinasi, chorvachilik va biotexnologiyalar universiteti Nukus filialida “Yashil makon” umummilliy loyiha doirasida ko‘chat ekish aksiyalari tashkil etilib, o‘quv yurti hududi yashil maydonga aylantirilmoqda. Jumladan, qayrag‘och, katalpa, tut, jiyda, archa, mevali va manzarali nihollar ekilmoqda.
Barcha ko‘ngilli talaba-yoshlar uyushqoqlik bilan 200 tupga yaqin mevali va manzarali nihollarni o‘tqazdilar. Shuningdek, hamjihatlikda ariq va yo‘laklar chiqindilardan tozalandi. Shu tarzda yoshlar faollik ko‘rsatib, filial hududida yashil maydon barpo etilishiga o‘zlarining ezgu hissalarini qo‘shdi.
Shu kunga qadar filial jamoasi va talaba-yoshlar umummilliy harakat doirasida amalga oshirilayotgan aksiyalarda faol ishtirok etib kelishmoqda. Jumladan, joriy yil bahor mavsumida filial va unga biriktirilgan hududlarda 8 ming tupga yaqin mevali va manzarali ko‘chat o‘tqazildi. Albatta, bunday ezgu ishlar davom ettirilib, joriy yil kuz mavsumida jami 7 ming tup daraxt va buta ko‘chatini ekish rejalashtirilgan.
Dovud Abibullayev, O‘zA muxbiri.