Samarqand davlat veterinariya meditsinasi, chorvachilik va biotexnologiyalar universiteti Nukus filialida “Ma’rifat ulashib” loyihasi doirasida Qoraqalpog‘iston xalq yozuvchisi, taniqli jurnalist O‘rozboy Abdurahmonov, O‘zbekistonda xizmat ko‘rsatgan madaniyat xodimi, Qoraqalpog‘iston xalq shoiri Rustam Musurmon va shoira Zebo Mirzo bilan uchrashuv bo‘lib o‘tdi. Filial rahbariyati taniqli ijodkorlarni ehtirom bilan qarshi oldi.

Tadbirda Qoraqalpog‘iston xalq yozuvchisi, filologiya fanlari nomzodi A.Abdiyev, O‘.Abdurahmonov, R.Musurmon va Zebo Mirzo so‘zga chiqib bugungi kunda yurtimizda adabiyot va ma’naviyatni yanada yuksaltirish borasida amalga oshirilayotgan ishlar haqida to‘xtalib, yoshlar qalbida milliy adabiyotimizga bo‘lgan mehr-muhabbatni yanada kuchaytirish maqsadida respublikamiz bo‘ylab tashkil etilayotgan “Ma’rifat ulashib” loyihasining ahamiyati haqida so‘z yuritdi.

Uchrashuvda mehmonlar ijod va hayot tajribalarini o‘rtoqlashdi. Shoira Zebo Mirzo Nukus shahridagi 33-sonli umumiy o‘rta ta’lim maktabida bo‘lib, o‘quvchilar bilan suhbatlashdi.

Uchrashuvlardan so‘ng loyiha doirasidagi tadbirlarga start berildi. Talaba-yoshlarni adiblarning ijodi bilan yanada yaqindan tanishtirish uchun “Zakovat” intellektual o‘yini o‘tkazildi. Unda ishtirokchi jamoalar mehmonlarning ijodiy faoliyatidan tuzilgan qiziqarli savollarga javob izlashdi. Shuningdek, zukko talabalar ishtirokida “Munozara” debat o‘yini o‘tkazildi.

Tadbirning yakuniy qismida esa mehmonlar va talaba-yoshlar gulxan atrofida jam bo‘lib, she’riyat, adabiyot haqida ijobiy fikr-mulohazalar bildirdi. “Ma’rifat ulashib” loyihasi doirasida tashkil etilgan tadbirlar talaba-yoshlarda katta taassurot qoldirdi.

Dovud Abibullayev, O‘zA muxbiri.