Xalqlar o‘rtasida do‘stlik, hamjihatlik aloqalarini mustahkamlash borasida mamlakatimizda ulkan ishlar amalga oshirilmoqda. Uning poydevorlarini yanada mustahkamlash bo‘yicha o‘ziga xos loyihalar yo‘lga qo‘yildiki, bu, do‘stona munosabatlarni mustahkamlash barobarida, ijtimoiy-iqtisodiy, madaniy va gumanitar yo‘nalishlarning yangi ufqlari ochilishiga olib kelmoqda.
Xususan, bir necha yillar muqaddam yoshlarimiz orasida intellektual telemusobaqa sifatida o‘tkazib kelingan “Zakovat”ning imkoniyatlari kengaydi. U o‘z tafakkur dunyosi bilan yurtimizda aholining barcha qatlamlarini qamrab olishi asnosida xalqaro maydonga yuz tutdi. Intellektual salohiyati yuqori insonlarning tafakkur maydoniga aylandi.
Qozog‘iston poytaxti Ostona shahrida Qozog‘iston va O‘zbekiston jamoalari o‘rtasida “Zakovat Asian Cup” turniri o‘tkazilgani ham mamlakatimizda boshlangan ommaviy-ma’rifiy harakat xalqaro maydonga yuz tutganidan dalolat.
“Zakovat” intellektual o‘yini Osiyo kubogi musobaqasining tantanali ochilish marosimida ishtirok etgan Qozog‘iston Respublikasi Prezidenti davlat maslahatchisi Erlan Karin, O‘zbekiston Respublikasi Prezidentining yordamchisi Saida Mirziyoyeva har ikki qardosh xalq o‘rtasidagi munosabatlar, hamjihatlik, hamkorlik aloqalari rivojlanayotganini ta’kidladi.
O‘zbekiston Respublikasi Prezidenti yordamchisi Saida Mirziyoyeva ishtirokchi jamoalarni qutlab, yoshlar bunyodkorlik jarayonlarida muhim o‘rin tutayotgani, taraqqiyotning asosiy omili sifatida faoliyat yuritayotganiga e’tibor qaratdi. Shu bilan birga, “Zakovat” loyihasining ikki davlat o‘rtasidagi madaniy-gumanitar hamkorlikni kengaytirishdagi ahamiyatini qayd etdi. Bunday loyihalar Markaziy Osiyo mamlakatlarida inson kapitali sifatini oshirishga ijobiy ta’sir ko‘rsatayotganini bildirdi.
Sharqona va zamonaviylikni mujassam ettirgan maydon, “Zakovat”gagina xos dizayn va dekoratsiya xalqaro turnirning nufuzini ko‘rsatdi. O‘zbekiston va Qozog‘iston zakovatchilarining tafakkur bahsi yangicha muhitni vujudga keltirdi.
“Zakovat Asian Cup” turnirining murosasiz kechgan tafakkur jangida O‘zbekiston jamoasi qozog‘istonlik zakovatchilarni 2:0 hisobida (5:2 va 4:2) mag‘lub etdi hamda kubokni qo‘lga kiritdi.
T.Ro‘ziyev, N.Abduvoitov (video), O‘zA muxbirlari
Ostona shahri, Qozog‘iston