Berdaq nomidagi Qoraqalpoq davlat universiteti, Olimpiya va paralimpiya sport turlariga tayyorlash markazi, Nukus shahridagi o‘yin turlari va yengil atletika sport maktabida ajratilgan maxsus yopiq zallarda Prezident maktabiga kirish imtihonlarining birinchi bosqichi bo‘lib o‘tdi.
Joriy yilda Prezident maktabiga 3 ming 135 ta ariza kelib tushgan bo‘lsa, shundan 2 ming 715 nafari imtihonda ishtirok etdi.
– Ixtisoslashtirilgan ta’lim muassasalari agentligi tizimida bugungi kunda 14 ta ixtisoslashtirilgan maktab, 3 ta ixtisoslashtirilgan maktab-internati faoliyat ko‘rsatib kelmoqda, – deydi Qoraqalpog‘iston Respublikasi Maktabgacha va maktab ta’lim vazirligi Ixtisoslashtirilgan maktablar faoliyatini muvofiqlashtirish shu’ba rahbari Bayrambay Xamidullayev. – Joriy yildan Muhammad al-Xorazmiy nomidagi tayanch ixtisoslashtirilgan maktabi Nukus filiali yangi ochildi.
Agentlik tizimidagi Prezident, ijod hamda ixtisoslashtirilgan maktablarga kirish imtihonlari katta sig‘imli 5 ta yopiq binoda o‘tkazilishi belgilangan. 2024-2025 o‘quv yili uchun ushbu maktablarga jami 16 ming 537 ta ariza kelib tushdi. Prezident maktabiga qabul qilingan hujjatlar bo‘yicha bitta o‘ringa o‘rtacha 134 ta, I.Yusupov nomidagi ijod maktabiga bitta o‘ringa 10 ta, ixtisoslashtirilgan maktablarga bitta o‘ringa 8 nafar o‘quvchidan to‘g‘ri kelmoqda. Ixtisoslashtirilgan maktablarga qabul qilingan hujjatlar bo‘yicha eng yuqori ko‘rsatkich Nukus shahar ixtisoslashtirilgan maktab-internatiga 1 ming 503 ta hujjat qabul qilinib, bitta o‘ringa 23 nafar o‘quvchi to‘g‘ri keldi. Shuningdek, Muhammad al-Xorazmiy nomidagi ixtisoslashtirilgan maktabi Nukus filialiga jami 3 ming 686 ta hujjat kelib tushgan bo‘lib, bitta o‘ringa 16 nafar o‘quvchi to‘g‘ri kelmoqda.
Agentlikning Qoraqalpog‘iston Respublikasi ixtisoslashtirilgan maktablariga kirish imtihonlari joriy yilning 4-, 5-, 6-iyul kunlari, Prezident maktabiga 1-bosqich kirish imtihonlari 7-iyul kuni bo‘lib o‘tdi. Tyanch ixtisoslashtirilgan maktablarning kirish imtihonlari 9-,10-iyul, ijod maktabining 3-bosqich kirish imtihonlari 10-iyul, Prezident maktabining 2-bosqich kirish imtihonlari esa 26-iyul kuni o‘tkazilishi rejalashtirilgan.
Dovud Abibullayev, Maqsad Habibullayev (surat),
O‘zA muxbirlari