![](https://cdn.uza.uz/2024/05/27/09/27/mDORHIH6jNKXS7tnDLJ4YODtAtCRwH1Q_front.jpg)
Peru poytaxti Lima shahrida og‘ir atletika bo‘yicha yakunlangan jahon chempionatida O‘zbekiston o‘smirlar terma jamoasi 12 medalga ega chiqdi. Shundan 2 tasi oltin, 4 tasi kumush va 6 tasi bronza.
Kecha jahon chempionatining so‘nggi kunida mahoratli og‘ir atletikachimiz Omadillo Olimov +102 kilogramm vaznda kechgan bahslarda ishtirok etdi. Lima supachasidagi murosasiz musobaqalar sarhisobiga ko‘ra, Omadillo Olimov dast ko‘tarishda 150 kilo, siltab ko‘tarishda 195 kilogramm hamda ikkikurashda 345 kilogramm toshni bo‘ysindirgan holda 3 ta kumush medalni qo‘lga kiritdi.
![](https://cdn.uza.uz/2024/05/27/09/27/or72t8HHm4aNjCTgOFm2OaW1SbmgOs5A_front.jpg)
Aytish lozim, jahon chempionati davomida Bekzod G‘ofurjonov 1 ta kumush va 2 ta bronzaga, Marjona Abdumutalova 1 ta kumush, 2 ta bronza, Ruslan Rahmatjonov 2 ta oltin, 1 ta kumush medalga sazovor bo‘lishi, Dilnoza Fayzullayeva jahon og‘ir atletikachi qizlari orasida kuchli o‘nlikdan o‘rin olishi mamlakatimizda mahoratli yosh sportchilarni tayyorlash, saralash, yo‘naltirish, ularga zarur shart-sharoitlar yaratish borasida olib borilayotgan ishlarning samarasi bo‘ldi, deyish mumkin.
T.Ro‘ziyev, O‘zA