Kecha Hindiston Qurolli kuchlarining Quruqlikdagi qo‘shinlar shtabi boshlig‘i general Manoj Pandening O‘zbekistonga to‘rt kunlik tashrifi boshlandi.
O‘zbekiston Mudofaa vazirligida Hindiston armiyasining yuksak martabali vakili qabul qilindi.
O‘zbekiston mudofaa vazirining birinchi o‘rinbosari – Qurolli kuchlar Bosh shtabi boshlig‘i general-mayor Shuhrat Xolmuhammedov bilan bo‘lgan uchrashuvda tomonlar ikki mamlakat o‘rtasidagi harbiy hamkorlik istiqbollari hamda bugun “Termiz” poligonida boshlangan qo‘shma harbiy o‘quv mashg‘ulotlarining beshinchi bosqichi jarayonlarini muhokama qildi.
Muzokaralardan so‘ng Hindiston delegatsiyasi a’zolari Qurolli kuchlar davlat muzeyida bo‘lib, bu yerda saqlanayotgan tarixiy eksponatlar bilan tanishdi.
General Manoj Pande o‘z tashrifi davomida O‘zbekiston Qurolli kuchlari akademiyasida Hindiston ko‘magida tashkil etilgan axborot texnologiyalar laboratoriyasining ochilishida qatnashib, “Termiz” poligonidagi “Do‘stlik-2024” beshinchi O‘zbekiston-Hindiston harbiy o‘quv mashg‘ulotlarini kuzatishi, shuningdek, qadimiy Samarqand shahriga tashrif buyurishi kutilmoqda.
Shuningdek, Hindiston Qurolli Kuchlari armiyasi generali, shuningdek, Toshkentda Hindistonning sobiq Bosh vaziri Lal Bahodur Shastri xotirasiga hurmat bajo keltiradi va G‘alaba bog‘ini ziyorat qilib, O‘zbekistonning Ikkinchi jahon urushidagi g‘alabaga qo‘shgan munosib hissasini qayd etadi.
Hindiston OAV General Manoj Pandening O‘zbekistonga tashrifi Toshkent va Dehli o‘rtasidagi mudofaa hamkorligini mustahkamlashda muhim qadam bo‘ladi, deb qayd etmoqda.
Aziza Alimova tayyorladi, O‘zA