Xabaringiz bor, «Transfermarkt» portali futbolchilarning transfer bo‘yicha barcha ma’lumotlarini omma e’tiboriga havola etib keladi. Ushbu portal Markaziy Osiyo va ayrim Yevropa qit’asi mamlakatlarining ayni paytdagi eng qimmat futbolchilarining yangi reytingini tuzib chiqdi.

Biz uchun ahamiyatlisi, «Transfermarkt» portali ekspertlari yangi reytingda hamyurtimiz, «SSKA» klubi a’zosi Abbosbek Fayzullayevning narxini 5 million yevroga baholagani va hozirgi kunda mamlakatimizning eng qimmat futbolchisi, deya e’tirof etganidir.

Ma’lumot uchun, bugunga qadar ushbu reytingda O‘zbekistonning eng qimmat futbolchisi Eldor Shomurodov edi. Italiyaning «Kalyari» jamoasi a’zosi bo‘lgan Eldorning transfer narxi bir paytlar 14 million yevroga baholangan. Afsuski, E.Shomurodovning transfer narxi keyingi yillarda muntazam arzonlab bormoqda. Abbosbek Fayzullayev esa aksincha, bu ko‘rsatkichda tez ko‘tarilyapti. Lekin ayni vaqtda terma jamoamiz sardori bo‘lgan Eldorning transfer narxi ham 5 million yevroni tashkil etmoqda.

Javohir Toshxo‘jayev, O‘zA