Qozog‘iston qurolli kuchlari ehtiyoji uchun mahalliy korxonalar tomonidan maxsus ishlab chiqarilgan ilk uchuvchisiz uchar qurilma testdan o‘tkazildi, deb xabar tarqatdi mamlakat mudofaa vazirligi matbuot xizmati.
– Yangi qurilma zamonaviy video kuzatuv uskunasi, o‘lchov asboblari (datchiklar), masofa o‘lchagich va issiqlik sezuvchi vositalar bilan ta’minlangan, – deyiladi xabarda. – Ekspertlar hukmiga turli uchish qurilmalari taqdim etildi. Dronlar maxsus rezina arqon yordamida katapult usulida samoga yo‘naltirilgan. Apparat joyidan xuddi vertolyot kabi ko‘tariladi va parvozni samolyotga o‘xshab davom ettiradi.
![](https://cdn.uza.uz/2024/02/06/10/51/IOnJ4Bm1P7aD9fQkAmmFbBjZmOdROt2d_front.jpeg)
Dronlar mahalliy korxonalar tomonidan qisqa vaqtda yaratilgan bo‘lib, harbiylarning barcha talabi va tavsiyasi hisobga olingan.
– Qurolli kuchlarga mahalliy sharoitda ishlab chiqarilgan dronlar qabul qilinishi byudjet mablag‘ini sezilarli ravishda tejaydi, – deya ta’kidlamoqda matbot xizmati.
Sinov nihoyasiga yetgach, komissiya a’zolari taqdim etilgan modellarni yanada takomillashtirish uchun ishlab chiqaruvchilarga muayyan tavsiyalar bergan.